ပထမဆုံးအကြိမ်ကျင်းပတဲ့ ကမ္ဘာ့ပျားနေ့ အထိမ်းအမှတ်အခမ်းအနားကို မတ်လ(၂၀)ရက်က ရန်ကုန်မြို့ မြန်မာနိုင်ငံငါးလုပ်ငန်းအဖွဲ့ချုပ်မှာ ပြုလုပ်ခဲ့ပါတယ်။ကမ္ဘာ့ပျားနေ့အထိမ်းအမှတ်အခမ်းအနားကို ပထမဆုံးအကြိမ်ကျင်းပတာဖြစ်ပြီး ပြည်သူတွေအနေနဲ့ ပျားမျိုးစိတ်များကို ထိန်းသိမ်းစောင့်ရှောက်တာဟာ တစ်ဖက်တစ်လမ်းက သဘာဝပတ်ဝန်းကျင်နဲ့ဂေဟစနစ်ကိုပါ စောင့်ရှောက်ခြင်းဖြစ်ကြောင်း နဲ့ ပျားတို့ရဲ့သဘာဝနဲ့ပျားရည်ရဲ့စစ်မှန်တဲ့ ဂုဏ်သတ္တိကိုသိရှိစေဖို့တွေအပြင် ပျားထွက်ပစ္စည်းတွေရဲ့ အရောင်းအ၀ယ် ဈေးကွက်လည်း ပိုမိုကျယ်ပြန့်လာစေဖို့ရည်ရွယ်ပြီး ကျင်းပခဲ့တာဖြစ်ပါတယ်။

အခမ်းအနားမှာ ပြည်တွင်းရှိ ဒေသအသီးသီးက ထွက်ရှိတဲ့ ပျားရည်များရဲ့အရည်အသွေးပိုင်းဆိုင်ရာ ပြိုင်ပွဲတွေ၊ ပျားရည်တင်ပို့ရောင်းချသူတွေရဲ့ ပျားထွက်ပစ္စည်း အရောင်းပြခန်းတွေကို ပါဝင်ပြသခဲ့တာဖြစ်ပါတယ်။ လက်ရှိပြည်တွင်းမှာ ပျားရည်ကို နိုင်ငံခြားသို့ တင်ပို့ရောင်းချမှုအနေနဲ့ နှစ်စဉ်ပျမ်းမျှ မက်ထရစ်တန်(၂၅၀၀) တင်ပို့ရောင်းချနေပြီး နိုင်ငံခြားဝင်ငွေ အမေရိကန်ဒေါ်လာ(၃.၇)သန်းရရှိနေပေမယ့် ပြည်ပနိုင်ငံတွေနဲ့ယှဉ်ရင် ပျားရည်ထုတ်လုပ်မှုနဲ့တင်ပို့ရောင်းချမှုတွေက  နည်းပါးနေသေးတာဖြစ်ပါတယ်။ မြန်မာနိုင်ငံပျားလုပ်ငန်းရှင်များအသင်းအနေနဲ့ ပျားအုံများတိုးတက်မွေးမြူနိုင်ရေး၊ ပျားစားကျက်များတိုးချဲ့ရှာဖွေပြီး လက်ရှိအခြေအနေထက် ပျားရည်ပိုမိုထုတ်လုပ်နိုင်ရေးနဲ့ ပုဂ္ဂလိကပျားမွေးမြူရေးကဏ္ဍ ဖွံ့ဖြိုးရေးအတွက် ပညာပေးဟောပြောပွဲတွေ၊ ပျားမွေးမြူရေးအတတ်သင် သင်တန်းများ ဖွင့်လှစ်ပို့ချနိုင်ရေးနဲ့ ပျားမွေးမြူရေးသုတေသနလုပ်ငန်းတွေကို ကျယ်ပြန့်စွာ လုပ်ဆောင်ဖို့ကို ဆောင်ရွက်နေတယ်လို့ သိရပါတယ်။

လက်ရှိပြည်တွင်းမှာ ပျားမွေးမြူသူလုပ်ငန်းရှင်(၉၅၀)ဦးနဲ့ လုပ်သား(၂၀၀၀)ခန့်က ပျားအုံ(၁၈၅၀၀၀)အုံ မွေးမြူလျက်ရှိပြီး နှစ်စဉ်ပျားရည် (၆၅၀၀)မက်ထရစ်တန် ထုတ်လုပ်လျက်ရှိတယ်လို့ သိရပါတယ်။

 

Related News