မြန်မာ့ကျောက်မျက်ရတနာတွေ နိုင်ငံတကာဈေးကွက်နဲ့အခွင့်အလမ်းကောင်းတွေရရှိနိုင်ဖို့ဆိုရင် ဥပဒေနဲ့အညီ တရားဝင်အခွန်ဆောင်ပြီးသား ကျောက်အကြွေတွေကို လွတ်လပ်စွာတင်ပို့ရောင်းချခွင့်ပြုရန် လိုအပ်တယ်လို့ မြန်မာနိုင်ငံကျောက်မျက်ရတနာလုပ်ငန်းရှင်များအသင်းက ပြောကြားထားပါတယ်။ နိုင်ငံတော်က ပြဋ္ဌာန်းပေးထားတဲ့(၁၉၉၅)ခုနှစ်ကျောက်မျက်ရတနာဥပဒေအရ မြန်မာ့ကျောက်မျက်ရတနာ ရောင်းဝယ်ရေးလုပ်ငန်းလိုင်စင်ရှိရင် တရားဝင်အခွန်ဆောင်ပြီးတာနဲ့ ပြည်ပကိုလွတ်လပ်စွာ တင်ပို့ရောင်းချနိုင်ကြောင်း ပါရှိတယ်လို့ မြန်မာနိုင်ငံကျောက်မျက်ရတနာလုပ်ငန်းရှင်များအသင်းက ပြောပါတယ်။

ဒါ့ကြောင့်လက်ရှိမှာ မြန်မာ့ကျောက်မျက်ရတနာရဲ့ နိုင်ငံတကာဈေးကွက်နဲ့အခွင့်အလမ်းကောင်းတွေရရှိနိုင်ဖို့  နိုင်ငံတကာက လိုချင်နေကြတဲ့ သွေးပြီးသားကျောက်အကြွေဆိုဒ်စုံကို အချိန်အခါမရွေး၊ ငွေပမာဏကန့်သတ်ချက်မရှိ တရားဝင်အခွန်ဆောင်ပြီးတာနဲ့လွတ်လပ်စွာ တင်ပို့ရောင်းချခွင့်ရရှိမယ်ဆိုတဲ့ မူဝါဒကို နိုင်ငံတော်က ချမှတ်ပေးဖို့လိုအပ်တယ်လို့ မြန်မာနိုင်ငံကျောက်မျက်ရတနာလုပ်ငန်းရှင်များအသင်း  ပြောပါတယ်။

ဒီအချက်ဟာ မြန်မာ့ကျောက်မျက်ရတနာတွေ နိုင်ငံတကာဈေးကွက်နဲ့ အခွင့်အလမ်းကောင်းတွေရရှိနိုင်ဖို့ နိုင်ငံတော်အနေနဲ့ ချက်ချင်းလုပ်ဆောင်ပေးလို့ရတဲ့ အချက်တစ်ခုအဖြစ် ရှိနေတယ်လို့လည်းဆိုပါတယ်။ဒီဥပဒေကို အကောင်အထည်ဖော်လုပ်ဆောင်နိုင်ဖို့ အကြောင်းမျိုးမျိုးကြောင့် လက်ရှိချိန်ထိ ကြန့်ကြာနေရပြီး လက်ရှိမှာ မြန်မာ့ကျောက်မျက်ရတနာတွေကို လက်ဝတ်ရတနာတွေအနေနဲ့ပဲ ပြည်ပကို တင်ပို့ရောင်းချ ခွင့်ပြုထားတယ်လို့လည်း မြန်မာနိုင်ငံကျောက်မျက်ရတနာလုပ်ငန်းရှင်များအသင်းက ပြောပါတယ်။

ဒီအခြေအနေဟာ နိုင်ငံတကာဈေးကွက်ကိုထိုးဖောက်နိုင်ဖို့အတွက် အခက်အခဲတစ်ခုအဖြစ်ရှိနေတယ်လို့လည်း ဆိုပါတယ်။ဒီအခြေအနေတွေနဲ့ပတ်သက်လို့ မြန်မာ့ကျောက်မျက်ရတနာနှင့် နိုင်ငံတကာဈေးကွက်အခွင့်အလမ်း  ခေါင်းစဉ်နဲ့ ပါမောက္ခဒေါက်တာအောင်ထွန်းသက်နဲ့အတူ  မြန်မာနိုင်ငံကျောက်မျက်ရတနာလုပ်ငန်းရှင်များအသင်း ဥက္ကဋ္ဌဦးဇော်ဘိုခန့်၊ ဒုတိယဥက္ကဋ္ဌ ဒေါက်တာအောင်ကျော်ဝင်း၊ (The Rich Gems)က မန်နေဂျင်းဒါရိုက်တာ ဒေါ်လုလုတို့က ဦးဆောင်ပြီး မေလ(၂၁)ရက်က UMFCCIမှာ ဆွေးနွေးခဲ့ကြတာဖြစ်ပါတယ်။

 

Related News