မြန်မာ့ကျောက်မျက် ရတနာဈေးကွက်မှာ အခွန်ကြီးမြင့်မှုကြောင့် ပြပွဲတွေမှာ တင်ပြရောင်းချမှုတွေ နည်းလာတယ်လို့ သိရပါတယ်။ ဒါ့ကြောင့် နိုင်ငံတော်က နှစ်စဉ်ရရှိနေတဲ့ မြန်မာ့ကျောက်မျက်ရတနာခွန်တွေအနေနဲ့လည်း တဖြည်းဖြည်း လျော့နည်းလာနေတယ်လို့ မြန်မာနိုင်ငံ ကျောက်မျက်ရတနာ လုပ်ငန်းရှင်များအသင်းက ပြောကြားပါတယ်။မြန်မာ့ကျောက်မျက်ရတနာများ တူးဖော်ရောင်းချမှုတွေမှာ အခွန်အနေနဲ့ အထူးကုန်စည်ခွန်က ရောင်းချမှုဝင်ငွေရဲ့(၅၀)ရာခိုင်နှုန်း အပါအ၀င် ရတနာခွန်၊ နိုင်ငံတော်နဲ့အကျိုးတူးပေါင်းလုပ်ဆောင်မှုအတွက် ၀န်ဆောင်ခ စတာတွေအားလုံး ပေါင်းလိုက်ရင် ရောင်းချမှုဝင်ငွေရဲ့ (၈၀)ရာခိုင်နှုန်းကျော်၊ (၉၀)ရာခိုင်နှုန်းခန့် ရှိနေတယ်လို့ မြန်မာနိုင်ငံ ကျောက်မျက်ရတနာ လုပ်ငန်းရှင်များအသင်း၊ ဥက္ကဋ္ဌ ဦးဇော်ဘိုခန့်က ပြောပါတယ်။ ဒီလို အခွန်အခတွေများလာတာ၊ တူးဖော်ရေးစရိတ်တွေ ကြီးမြင့်လာတာ၊  ကုန်ကျစရိတ်တွေများလာတာစတဲ့ အခြေအနေ တွေကြောင့်  ကျောက်မျက်ရတနာပြပွဲတွေမှာ တင်ပြရောင်းချတာတွေနည်းလာတယ်လို့လည်း ဆိုပါတယ်။ 

မြန်မာ့ ကျောက်မျက်ရတနာဈေးကွက် အပါအ၀င် တရုတ်ပြည် ဈေးကွက်မှာလည်း တင်ပြရောင်းချတဲ့ မြန်မာ့ကျောက်တွေ နည်းနေပြီး ဈေးကွက်သိပ်မကောင်းပေမယ့်  တရုတ်ပြည်ကို ရောက်ရှိနေဆဲ ဖြစ်တယ်လို့လည်း ဆိုပါတယ်။ ပြည်တွင်းမှာ လက်ရှိ ကျောက်မျက်ရတနာ တူးဖော်ထုတ်လုပ်ရေး လုပ်ငန်းတွေ ရပ်ဆိုင်းနေတာတွေ ရှိနေပေမယ့် ကျောက်ထွက်ရှိမှုကတော့ သိပ်ပြီး လျော့ကျမသွားဘူးလို့လည်း သိရပါတယ်။

(၂၀၁၃-၂၀၁၄)ဘဏ္ဍာနှစ်မတိုင်ခင်ထိ နိုင်ငံတော်အနေနဲ့ မြန်မာ့ကျောက်မျက်ရတနာတွေကနေ  တစ်နှစ်အခွန်ငွေ အမေရိကန်ဒေါ်လာ(၁)ဘီလီယံနဲ့ အထက်ရရှိခဲ့ပြီး အဲဒီနောက်ပိုင်းကနေ နှစ်စဉ်တဖြည်းဖြည်းနိုင်ငံတော်အနေနဲ့ အခွန်ရရှိမှုတွေလည်း ကျဆင်းလာခဲ့တယ်လို့ သိရပါတယ်။ (၂၀၁၃ -၂၀၁၄)ဘဏ္ဍာနှစ်မှာ အမေရိကန်ဒေါ်လာသန်း(၃၀၀)ကျော်ပေးဆောင်နိုင်ခဲ့ပြီး  (၂၀၁၄-၂၀၁၅) ဘဏ္ဍာနှစ်က အမေရိကန်ဒေါ်လာသန်း(၂၀၀)ကျော်၊ (၂၀၁၅-၂၀၁၆) ဘဏ္ဍာနှစ်က အမေရိကန်ဒေါ်လာသန်း(၂၀၀)ကျော်၊ (၂၀၁၆-၂၀၁၇)ဘဏ္ဍာနှစ်က အမေရိကန်ဒေါ်လာသန်း(၁၉၀) ကျော်ရှိခဲ့တယ်လို့ သိရပါတယ်။ ဒီအခြေအနေတွေနဲ့ ပတ်သက်လို့ မြန်မာ့ကျောက်မျက်ရတနာနှင့် နိုင်ငံတကာ ဈေးကွက်အခွင့်အလမ်းခေါင်းစဉ်နဲ့ ပါမောက္ခဒေါက်တာအောင်ထွန်းသက်နဲ့အတူ  မြန်မာနိုင်ငံကျောက်မျက် ရတနာလုပ်ငန်းရှင်များ အသင်း ဥက္ကဋ္ဌ ဦးဇော်ဘိုခန့်၊ ဒုတိယဥက္ကဋ္ဌ ဒေါက်တာအောင်ကျော်ဝင်း၊ (The Rich Gems)က မန်နေဂျင်းဒါရိုက်တာ ဒေါ်လုလုတို့က ဦးဆောင်ပြီး မေလ(၂၁)ရက်က UMFCCIမှာ ဆွေးနွေးခဲ့ကြတာဖြစ်ပါတယ်။ 

 

Related News