မြန်မာနိုင်ငံကနေ တင်ပို့ခွင့်ရရှိထားတဲ့ ဆန်တန်ချိန်တစ်သိန်းကို လာမယ့်အောက်တိုဘာလမတိုင်ခင်မှာ တရုတ် ပြည်သူ့သမ္မတနိုင်ငံကို အမြန်ဆုံးပေးပို့နိုင်အောင် စီစဉ်ဆောင်ရွက်လျက်ရှိတယ်လို့ ဇွန်လ(၁၀)ရက်ကနေပြည်တော်ရှိ စီးပွားရေးနဲ့ကူးသန်းရောင်းဝယ်ရေးဝန်ကြီးဌာနမှာ ပြုလုပ်ခဲ့တဲ့ နှစ်နိုင်ငံအစိုးရချင်း သဘောတူညီချက်ရရှိထားပြီးဖြစ်သည့် တရုတ်ပြည်သူ့သမ္မတနိုင်ငံသို့ ပင်လယ်ရေကြောင်းမှတစ်ဆင့် ဆန်တန်ချိန်(၁)သိန်းတင်ပို့ရေးကိစ္စနှင့် ပတ်သက်သည့် ညှိနှိုင်းအစည်းအဝေးမှာ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယ၀န်ကြီး ဦးအောင်ထူးက ပြောကြား ခဲ့တာပါ။

တရုတ်နိုင်ငံဘက်မှ ကန့်သတ်ပမာဏ ကိုတာ(quota)ကို လာမယ့်အောက်တိုဘာလမှာ ထပ်မံပြင်ဆင်ဖို့ ရှိတဲ့အတွက် လက်ရှိရရှိထားတဲ့ ဆန်တန်ချိန် တစ်သိန်းကို အောက်တိုဘာလမတိုင်ခင်မှာ အမြန်ဆုံးပေးပို့နိုင်အောင် စီစဉ်ဖို့လိုအပ်တယ်ဆိုတဲ့အချက်ကို တွေ့ရှိရတယ်လို့ သိရပါတယ်။ အဲ့ဒါကြောင့် Myanmar Inspection and Test Service (MITS) အနေနဲ့ ဆန်စက် (၉၉)လုံးကို ထပ်မံစိစစ်ပြီးပြီဖြစ်တဲ့အတွက် တရုတ်နိုင်ငံဘက်ကို အကြောင်းကြားပြီး ဆန်တွေကိုအချိန်မီပေးပို့နိုင်အောင်လို့ ဆောင်ရွက်သွားမှာဖြစ်တယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယ၀န်ကြီး ဦးအောင်ထူးကပြောကြားခဲ့ပါတယ်။ (၂၀၂၀)ခုနှစ်အထိကာလကြာရှည်တဲ့ MOU မှာ တရုတ်ဘက်ကစစ်ဆေးထားတဲ့ ဆန်စက်ပေါင်း (၁၁)လုံး ရှိတယ်လို့သိရပါတယ်။ စစ်ဆေးရရှိထားတဲ့ ဆန်စက်ပေါင်း (၁၁)လုံးကထွက်လာတဲ့ဆန်တွေကိုပဲ တင်ပို့လို့ရတာ ဖြစ်တဲ့အတွက် ပထမရရှိတဲ့ ကန့်သတ်ပမာဏ ကိုတာ(quota) တစ်သိန်းကို ပြည့်မှီအောင် (၂)နှစ်လောက်ထိ တင်ပို့ခဲ့ရတယ်ဆိုတာကို အတွေ့အကြုံတွေအရ သိရှိရတယ်လို့ ပြောပါတယ်။

အခုဆန်တန်ချိန်တစ်သိန်း ထပ်ရတဲ့အခါမှာတော့ မြန်မာနိုင်ငံမှာလည်း ဆန်တွေပိုလျှံနေတဲ့အတွက် အမြန်ဆုံးတင်ပို့ရောင်း ချနိုင်အောင် ဆောင်ရွက်လျက်ရှိတယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယ၀န်ကြီး ဦးအောင်ထူးက ပြောကြားခဲ့ပါတယ်။ မြန်မာနိုင်ငံမှာ (၂၀၁၉)ခုနှစ်အတွင်း ဆန်စပါးတန်ချိန် (၃.၂)သန်းကျန်ရှိနေပြီး အဲ့လိုကျန်ရှိနေတဲ့ ဆန်စပါးတွေကို တင်ပို့နိုင်ဖို့အတွက် တရုတ်နိုင်ငံအပါအ၀င် နိုင်ငံတကာဆန်ဈေးကွက်ကို ရောင်းချနိုင်ဖို့အတွက် တတ်နိုင်သမျှ ပြင်ဆင်ဆောင်ရွက်လျက်ရှိတယ်လို့ သိရပါတယ်။ 

 

Related News