လာမယ့်အောက်တိုဘာ(၁)ရက်က စတင်မယ့် (၂၀၁၉-၂၀၂၀)ဘဏ္ဍာရေးနှစ်မှာ ရန်ကုန်တိုင်းဒေသကြီးရဲ့ ရသုံးမှန်းခြေ ငွေစာရင်းအရ ရန်ကုန်တိုင်းဒေသကြီးအတွက် ဘတ်ဂျက်ငွေ ကျပ်(၇၇၂)ဘီလီယံကျော် သုံးစွဲသွားမှာ ဖြစ်တယ်လို့ သိရပါတယ်။ ရန်ကုန်တိုင်းဒေသကြီးအစိုးရအဖွဲ့က(၂၀၁၉-၂၀၂၀)ဘဏ္ဍာရေးနှစ်၊ ရန်ကုန်တိုင်းဒေသကြီးရဲ့ ရသုံးမှန်းခြေငွေစာရင်းကို တိုင်းဒေသကြီးလွှတ်တော်ကိုရှင်းလင်းတင်ပြဖို့အတွက် ဒုတိယအကြိမ်ရန်ကုန် တိုင်းဒေသကြီးလွှတ်တော် အရေးပေါ်အစည်းအဝေး(၁/၂၀၁၉)အဖြစ် ဇွန်လ(၁၁)ရက်ကခေါ်ယူကျင်းပကာ  ရှင်းလင်းတင်ပြခဲ့တာပါ။ (၂၀၁၉-၂၀၂၀)ဘဏ္ဍာရေးနှစ်မှာ သာမန်အသုံးစရိတ်အဖြစ် ကျပ် (၂၀၃)ဘီလီယံကျော်နဲ့ ငွေလုံးငွေရင်းအသုံးစရိတ်အဖြစ် ကျပ်(၅၆၈)ဘီလီယံကျော်သုံးစွဲမှာဖြစ်ပြီး စုစုပေါင်းကျပ်(၇၇၂)ဘီလီယံကျော် သုံးစွဲသွားမှာဖြစ်တယ်လို့သိရပါတယ်။

ဒီလိုသုံးစွဲနိုင်ဖို့အတွက် တိုင်းဒေသကြီးကရရှိတဲ့ အခွန်အခတွေအပါဝင် ပြည်ထောင်စုက ခွဲဝေချထားပေးတဲ့ ရငွေတွေအနေနဲ့ကတော့ သာမန်ရငွေကျပ်(၅၇၈)ဘီလီယံကျော် ၊ ငွေလုံးငွေရင်းရငွေကျပ်(၃၂)ဘီလီယံကျော် ၊ ကြွေးမြီးရငွေအနေနဲ့က ကျပ်(၁၆၀)ဘီလီယံ၊ စုစုပေါင်းကျပ်(၇၇၂)ဘီလီယံကျော် ဖြစ်တယ်လို့သိရပါတယ်။ ရငွေနဲ့အသုံးစရိတ်ကို နှိုင်းယှဉ်ကြည့်မယ်ဆိုရင်တော့ သာမန်ရသုံးမှန်းခြေငွေစာရင်းမှာ ရငွေက လာမယ့် (၂၀၁၉-၂၀၂၀)ဘဏ္ဍာရေးနှစ်မှာသုံးမယ့် အသုံးစရိတ်ထက် ကျပ်(၃၇၅)ဘီလီယံကျော်ပိုခဲ့ပြီး ငွေလုံးငွေရင်းရသုံးမှန်ခြေငွေစာရင်းမှာတော့  ရငွေထက် လာမယ့်(၂၀၁၉-၂၀၂၀)ဘဏ္ဍာရေးနှစ်မှာသုံးမယ့် အသုံးစရိတ်က ကျပ်(၅၃၆)ဘီလီယံကျော် ပိုသုံးခဲ့တယ်လို့သိရပါတယ်။

ရန်ကုန်တိုင်းဒေသကြီးရဲ့(၂၀၁၉-၂၀၂၀)ဘဏ္ဍာရေးနှစ် ရသုံးခန့်မှန်းခြေငွေစာရင်းနဲ့ပတ်သက်လို့ ရန်ကုန်တိုင်းဒေသကြီးလွှတ်တော် ပြည်သူ့ငွေစာရင်းကော်မတီရဲ့အစီရင်ခံစာဖတ်ကြားခြင်းနဲ့ ဆွေးနွေးလိုတဲ့ ကိုယ်စားလှယ်တွေဆွေးနွေးခြင်းကို ဇွန်လ(၁၂)ရက်မှာ ပြုလုပ်မယ့် ဒုတိယအကြိမ်ရန်ကုန်တိုင်းဒေသကြီးလွှတ်တော် အရေးပေါ်အစည်းအဝေး ဒုတိယနေ့မှာ ပြုလုပ်သွားမှာဖြစ်ပါတယ်။(၂၀၁၉-၂၀၂၀)ဘဏ္ဍာရေးနှစ်မှာ ရန်ကုန်တိုင်းဒေသကြီးရဲ့ ရသုံးမှန်းခြေငွေစာရင်းကို ခုကျင်းပနေတဲ့ ဒုတိယအကြိမ်ရန်ကုန်တိုင်းဒေသကြီးလွှတ်တော်အရေးပေါ်အစည်းအဝေး(၁/၂၀၁၉)ကာလအတွင်း ရန်ကုန်တိုင်းဒေသကြီးလွှတ်တော်က အတည်ပြုသွားဖို့ရှိနေတာဖြစ်ပါတယ်။

 

Related News