ဝန်ကြီးချုပ်ဟောင်းဦးနုကို အမှတ်တရရှိတဲ့အနေနဲ့ ကျန်ရစ်သူမိသားစုဝင်တွေနဲ့ ဦးနုထာဝရ ရန်ပုံငွေအဖွဲ့တို့ ပူးပေါင်းပြီး ဦးနု(၁၁၂)နှစ်ပြည့်မွေးနေ့ အထိမ်းအမှတ်အခမ်းအနားကို ဇွန်လ(၁၇)ရက်က ပြုလုပ်ခဲ့ပါတယ်။ ဦးနုမွေးနေ့အထိမ်းအမှတ်အခမ်းအနားကို နှစ်စဉ်ပြုလုပ်လာတာ (၂၄)နှစ်ရှိပြီဖြစ်ပြီး အခုနှစ်မှာလည်း အစဉ်အလာမပျက် ရန်ကုန်မြို့ ကမ္ဘာအေးစေတီလမ်းပေါ်မှာရှိတဲ့ ချမ်းမြေ့ရိပ်သာကျောင်းတိုက်မှာ ပြုလုပ်ခဲ့ပါတယ်။ အခုအခမ်းအနားကိုတော့ ဦးနုရဲ့မိသားစုဝင်တွေ၊ စာပေလောကသားတွေ တက်ရောက်ခဲ့ကြပါတယ်။ဦးနုဟာ ရန်ကုန်တက္ကသိုလ်သမဂ္ဂဥက္ကဋ္ဌနဲ့ ဖ.ဆ.ပ.လ ခေါင်းဆောင်ဖြစ်ခဲ့သလို  လွတ်လပ်ရေးရပြီးချိန်ကစလို့ (၁၉၆၂)ခုနှစ်အထိ မြန်မာနိုင်ငံရဲ့ ပထမဆုံးဝန်ကြီးချုပ်အဖြစ် တာဝန်ထမ်းဆောင်ခဲ့သူတစ်ဦးပါ။ ၀န်ကြီးချုပ်ဖြစ်ချိန် ဆဋ္ဌမသင်္ဂါယနာ တင်ခဲ့သလို မိတ္တဗလဋီကာ၊ တာတေစနေသား၊ ငရဲဆိုတာချိုနဲ့လား အပါအ၀င် စာပေများစွာ ရေးသားခဲ့လို့ စာပေလောကမှာလည်း ထင်ရှား သူတစ်ဦးဖြစ်ခဲ့ပါတယ်။

ဦးနု ထာဝရရန်ပုံငွေအဖွဲ့အနေနဲ့ နှစ်စဉ်မွေးနေ့အထိမ်းအမှတ်ပြုလုပ်လေ့ရှိသလို နှစ်ပေါင်း(၆၀)ကျော် သက်တမ်းရှိပြီဖြစ်တဲ့ ဗဟန်းမြို့နယ်က ဦးနုနောက်ဆုံး ခေါင်းချခဲ့တဲ့ နေအိမ်ကိုလည်း ပြီးခဲ့တဲ့နှစ်မတ်လ(၂၅)ရက်ကစပြီး ပြတိုက်အဖြစ် အခမဲ့ ဖွင့်လှစ်ပြသထားတာဖြစ်ပါတယ်။
ပြတိုက်မှာ ဦးနုရဲ့အသုံးအဆောင်တွေ၊ နောက်ဆုံးကျန်ရှိခဲ့တဲ့ ပစ္စည်းတွေ၊ ဓာတ်ပုံတွေကပြောတဲ့ သမိုင်းတွေကိုလည်း မြင်တွေ့ရမှာ ဖြစ်ပါတယ်။ စာရေးဆရာတစ်ဖြစ်လဲ ဦးနုရဲ့ စာပေတွေကို ဒီအိမ်ထဲမှာ ဖတ်ရှုနိုင်မှာ ဖြစ်ပါတယ်။ဦးနုကို (၁၉၀၇)ခုနှစ်၊ ၀ါးခယ်မမြို့မှာ မွေးဖွားခဲ့တာဖြစ်ပြီး အသက်(၈၇)နှစ်အရွယ် ၁၉၉၅ ခုနှစ်၊ ဖေဖော်ဝါရီ(၁၄)ရက်မှာ ကွယ်လွန်ခဲ့ပါတယ်။ အခုဆို ဦးနုကွယ်လွန်တာ(၂၄)နှစ်ရှိပြီဖြစ်ပါတယ်။


 

Related News