လက်ရှိ တညင်းကုန်းဈေးဟောင်းမှာ ဖွင့်လှစ်ရောင်းချနေတဲ့ ဈေးသူ/ဈေးသားတွေအနေနဲ့  ဇွန်လ(၂၀)ရက်နောက်ဆုံးထားပြီး တညင်းကုန်းဈေးအသစ်ကို အပြီးပြောင်းရွှေ့ပေးရမှာဖြစ်တယ်လို့ ဇွန်လ(၁၇)ရက်က ရန်ကုန်မြို့ မြို့တော်ခန်းမမှာပြုလုပ်ခဲ့တဲ့ သတင်းစာရှင်းလင်းပွဲမှ သိရပါတယ်။ ရန်ကုန်တိုင်းဒေသကြီး အင်းစိန်မြို့နယ် ရွှေပြည်သာတံတားအဆင်းနဲ့ ပုလဲလမ်းထောင့်မှာတည်ရှိတဲ့ တညင်းကုန်း လက်ကားဈေးဟောင်းကြီး က (၁၀)ဧကကျယ်ဝန်းပြီး မြေစိုက်ဈေးရုံ (၁၁)ရုံ ၊မှတ်ပုံတင်ဆိုင်ခန်း (တစ်ထောင့်ရှစ်ဆယ့်ခုနှစ်ခန်း)ရှိပြီး ပျံကျရောင်းချတဲ့ဈေးသည် (၁၆၇)ဦးရှိပါတယ်။ တညင်းကုန်းလက်ကားဈေးဟောင်းကြီး ဘေးဘက်ခြမ်းမှာတော့ လက်ရှိအသစ်ဆောက်လုပ်နေတဲ့ တညင်းကုန်းလက်ကား ဈေးသစ်ကြီးတည်ရှိပြီး အဆိုပါဈေးအသစ်ကြီးထဲမှာတော့ သစ်သီးလက်ကားဈေးရုံ၊ ဟင်းသီးဟင်းရွက်၊ စားဖိုဆောင်သုံး သစ်သီးဝလံပစ္စည်း လက်ကားဈေးရုံနဲ့ တောင်သူလက်လီရောင်းချတဲ့ဈေးရုံ စတဲ့ ဈေးရုံကြီးတွေကို တည်ဆောက်ခဲ့ပြီး လက်ရှိမှာတော့ ဈေးရောင်းချသူတွေ ရှိနေပြီဖြစ်ပါတယ်။ ဈေးသူ/ဈေးသားတွေအနေနဲ့ ဈေးဟောင်းကနေ ဈေးသစ်ကို ပြောင်းရွှေ့ရာမှာ သယ်ယူပို့ဆောင်ရေးအတွက် လိုအပ်တဲ့ ကားတွေအပြင် ဈေးပြောင်းရွှေ့ရာမှာ အဆင်ပြေနိုင်စေဖို့အတွက်  ရန်ကုန်မြို့တော်စည်ပင်သာယာရေးကော်မတီ ဈေးများဌာနမှ တာဝန်ယူဆောင်ရွက်သွားမှာဖြစ်တယ်လို့ သိရပါတယ်။ 

တညင်းကုန်းလက်ကားဈေးဟောင်းမှာ မှတ်ပုံတင်ပြီးဈေးဆိုင်ခန်းတွေကိုတော့ ဈေးအသစ်ကြီးမှာ ဆိုင်ခန်းခတွေကို လျှော့ချပေးထား ပြီး ရေခွန်၊ မီးခွန်စတာတွေအပြင် သန့်ရှင်းရေးခတွေပါ  လျှော့ချထားပေးထားတယ်လို့ သိရပါတယ်။ ဒါ့အပြင် ဈေးအသစ်ကိုပြောင်းရွှေ့မယ့် ဈေးဟောင်းမှ ဈေးသူဈေးသားတွေကိုလည်း မိမိတို့အရင်ကရောင်းချခဲ့တဲ့ ဆိုင်ခန်းနေရာအတိုင်း ပြန်လည်သတ်မှတ်ပေးထားတယ်လို့ သိရပါတယ်။တညင်းကုန်းလက်ကားဈေးသစ်ကြီးကို ဇွန်လ(၂၀)ရက်မှာ အပြီးပြောင်းရွှေ့ပြီးရင်တော့ တညင်းကုန်းလက်ကားဈေးဟောင်းကြီးကို ဇွန်လ (၂၁)ရက်မှာပိတ်သိမ်းလိုက်မှာဖြစ်တယ်လို့သိရပါတယ်။ တညင်းကုန်းလက်ကားဈေးအသစ်ကြီးမှာတော့ ဈေးဆိုင်ခန်းတွေအပြင် ဈေးလာရောက်ဝယ်ယူသူတွေအဆင်ပြေစေဖို့အတွက် ကားပါကင်၊ ဈေးလုံခြုံရေးအပိုင်းအနေနဲ့ CCTV တပ်ဆင်ထားပြီး ဈေး သန့်ရှင်းရေးနဲ့ လုံခြုံရေးအပိုင်းမှာလည်း ပုဂ္ဂလိက ၀န်ထမ်းတွေကိုပါ ခန့်အပ်ထားတယ်လို့သိရပါတယ်။

 

 

Related News