မြန်မာနိုင်ငံ ကိုယ်အင်္ဂါမသန်စွမ်းသူများအသင်း(မန္တလေးတိုင်းဒေသကြီးရုံး) ဖွင့်လှစ်ခြင်း(၉)နှစ်ပြည့်အခမ်းအနားနဲ့ အလှူငွေများပေးအပ်လှူဒါန်းပွဲကို ဇွန်လ(၁၇)ရက်က မန္တလေးမြို့၊ မြို့တော်ခန်းမမှာ ပြုလုပ်ခဲ့ပါတယ်။ မြန်မာနိုင်ငံကိုယ်အင်္ဂါမသန်စွမ်းသူများအသင်းအနေနဲ့ တိုင်းနဲ့ပြည်နယ် အသီးသီးမှာ ရုံးခွဲဖွင့်လှစ်ပြီး အသင်းဝင် ကိုယ်အင်္ဂါမသန်စွမ်းသူတွေအတွက် နှစ်စဉ်ပညာရေးထောက်ပံ့မှု၊ ကျန်းမာရေးထောက်ပံ့မှု၊ အထောက်အကူပြုပစ္စည်းများ၊ အလုပ်အကိုင်အခွင့်အလမ်းများနဲ့ လူမှုရေးကူညီမှုတွေကို ဆောင်ရွက်ပေးနေပါတယ်။ မန္တလေးတိုင်းဒေသကြီးရုံးကို၂၀၁၀ ပြည့်နှစ်က စတင်ဖွင့်လှစ်ခဲ့တာဖြစ်ပြီး အခုနှစ်မှာတော့  (၉)နှစ်ပြည့်ခဲ့တာဖြစ်ပါတယ်။ ဒီ (၉)နှစ်ပြည့် အထိမ်းအမှတ် အခမ်းအနားနဲ့ မူလတန်း၊ အလယ်တန်း၊ အထက်တန်းကျောင်းက မသန်စွမ်းကျောင်းသားကျောင်းသူ(၁၀၅)ဦးကို ကျောင်းသုံးစာရေးကိရိယာ၊ ပညာသင်စရိတ်နဲ့ မသန်စွမ်းအထောက်အကူပြုပစ္စည်းတွေကို ပေးအပ်လှူဒါန်းခဲ့တာပါ။ မသန်စွမ်းသူတွေအတွက် တစ်ဖက်တစ်လမ်းက ဝန်ထုပ်ဝန်ပိုးလျှော့စေဖို့နဲ့ စိတ်ခွန်အားရစေဖို့ ရည်ရွယ်ထောက်ပံ့ ပေးခဲ့တာလို့ သိရပါတယ်။

မြန်မာနိုင်ငံကိုယ်အင်္ဂါမသန်စွမ်းသူများအသင်းကို တိုင်းနဲ့ပြည်နယ် အသီးသီးမှာ ရုံးခွဲပေါင်း(၃၅) ရုံးလှစ်ထားပြီး အဖွဲ့ဝင်အနေနဲ့ (၁)သောင်းကျော်ရှိတယ်လို့ သိရပါတယ်။ မြန်မာနိုင်ငံ ကိုယ်အင်္ဂါမသန်စွမ်းသူများအသင်းကို ဆက်သွယ်ပြီး မသန်စွမ်းသူတွေအတွက် လှူဒါန်းမှုတွေလည်းပြုလုပ်နိုင်တယ်လို့သိရပါတယ်။ မသန်စွမ်းတွေအတွက် အခွင့်အရေးတွေလည်းရှိလာပြီ ဖြစ်သလို မသန်စွမ်းသူတွေအတွက် အလုပ်အကိုင်အခွင့်အလမ်းတွေများစွာ လိုအပ်လာတယ်လို့ သိရပါတယ်။မြန်မာနိုင်ငံကိုယ်အင်္ဂါမသန်စွမ်းသူများအသင်း(မန္တလေးတိုင်းဒေသကြီးရုံး)ဖွင့်လှစ်ခြင်း (၉)နှစ်ပြည့်အခမ်းအနားကို မန္တလေးတိုင်းဒေသကြီးသယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်၊ လူမှုဝန်ထမ်းဦးစီးဌာနက တာဝန်ရှိသူတွေနဲ့ မြန်မာနိုင်ငံကိုယ်အင်္ဂါမသန်စွမ်းသူများအသင်း အဖွဲ့ဝင်တွေနဲ့ ကျောင်းသားကျောင်းသူတွေ တက်ရောက်ခဲ့ကြပါတယ်။

 

Related News