မိုးတွင်းကာလရောက်ရှိလာတာကြောင့် အဝေးပြေးကုန်စည်ပို့ဆောင်ရမှု အေးသွားပြီး တန်ဆာခတွေက အသွားအပြန် တစ်ကြောင်းသာဈေးရရှိလို့ အခက်အခဲတွေဖြစ်နေတယ်လို့ အဝေးပြေးကုန်စည် ပို့ဆောင်ရေးလုပ်ငန်းရှင်များအသင်းက သိရပါတယ်။ အဝေးပြေးကုန်စည်ပို့ဆောင်မှုယာဉ်တွေအနေနဲ့ နွေရာသီကာလမှာ (၁၄)ဘီးယာဉ်အတွက် (၃၁)တန်၊ (၁၈)ဘီးယာဉ်အတွက် (၄၆)တန်၊ (၂၂)ဘီးယာဉ်အတွက် (၅၀.၅)တန်ခွင့်ပြုပေးထားပြီး မိုးတွင်းကာလတွေမှာ(၁၄)ဘီးယာဉ်အတွက် တန်(၃၀)၊ (၁၈)ဘီးယာဉ်အတွက် (၄၃.၅)တန်၊ ၂၂ ဘီးယာဉ်အတွက် (၄၈)တန်ကို တင်ဆောင်ခွင့် ပေးထားတယ်လို့သိရပါတယ်။ နှစ်စဉ် မေလ(၁၅)ရက် ရောက်တိုင်း  ကုန်တွေကို သတ်မှတ်တန်ချိန်အတိုင်း လျော့တင်နေရတာဖြစ်ပါတယ်။ ဒါ့အပြင် ဧရာဝတီတိုင်းဒေသကြီးနဲ့ ရခိုင်ပြည်နယ်က ဒေသအချို့ကို ကုန်စည်တွေသယ်ယူပို့ဆောင်ရာမှာလည်း တန်သတ်မှတ်လိုက်ပြီး(၆)ဘီးယာဉ်တွေကိုသာ သယ်ယူခွင့်ပြု လိုက်တာကြောင့် ယာဉ်ပိုင်ရှင်၊ဂိတ်ပိုင်ရှင်တွေအတွက် အခက်အခဲတွေရှိတယ်လို့ သိရပါတယ်။

သယ်ယူပို့ဆောင်ရာမှာ အသွားအပြန် နှစ်ကြောင်းရှိတဲ့အနက် တစ်ကြောင်းသာ တန်ဆာခဈေးကောင်းရနေပြီး ကျန်တစ်ကြောင်းရဲ့ တန်ဆာခရရှိမှုက နည်းပါးသွားတယ်လို့ သိရပါတယ်။ ရန်ကုန်- မူဆယ်အတွက် တွဲကားတစ်စီးကို ငွေကျပ်(၁၅)သိန်း တန်ဆာခဈေးရှိပြီး  မူဆယ် - ရန်ကုန် တွဲကားတစ်စီးကို ငွေကျပ် (၃၁)သိန်းအထိ တန်ဆာခဈေးရရှိတယ်လို့သိရပါတယ်။ကုန်စည်ပို့ဆောင်မှုဟာ အသွား၊အပြန်ရှိတာဖြစ်ပြီး လမ်းကြောင်း တစ်ကြောင်းသာကုန်စည် အများအပြားသယ်ဆောင်ရကာ တစ်ကြောင်းကတော့ အနည်းငယ်သာ သယ်ဆောင်ရတယ်လို့ သိရပါတယ်။ ဒါဟာ မြို့နယ်အသီးသီးကို ဆွဲတဲ့ကားဂိတ်တိုင်း ဒီလိုအခြေအနေတွေကို ကြုံတွေ့ရတာလို့ ပြောပါတယ်။မိုးရာသီအစမှာ ဒီလိုအခက်အခဲတွေဖြစ်ပေါ်နေရင် မိုးတွင်းကာလမှာ ယာဉ်ပိုင်ရှင်တွေ၊ ဂိတ်ပိုင်ရှင်တွေအတွက် အခက်အခဲတွေဖြစ်ပေါ်နိုင်တယ်လို့ အဝေးပြေးကုန်စည်ပို့ဆောင်ရေးလုပ်ငန်းရှင်တွေက သုံးသပ်ထားပါတယ်။

 

 

Related News