လူဦးရေများပြားပြီး အခြားဒေသတွေကနေ လူအဝင်/အထွက်သွားလာသူများပြားတဲ့ လှိုင်သာယာမြို့နယ်ကို ခရိုင်အဆင့်တိုးမြှင့်သတ်မှတ်ပေးဖို့ရှိ၊မရှိ ဇူလိုင်လ(၁၀)ရက်ကပြုလုပ်တဲ့ ရန်ကုန်တိုင်းဒေသကြီးလွှတ်တော် န၀မပုံမှန်အစည်းအဝေးမှာ တိုင်းဒေသကြီးလွှတ်တော်ကိုယ်စားလှယ် ဦးဝင်းမောင်က ကြယ်ပွင့်ပြမေးခွန်းအဖြစ် မေးမြန်းခဲ့တာဖြစ်ပါတယ်။ လှိုင်သာယာမြို့နယ်တွင်း လက်ရှိနေထိုင်နေတဲ့ လူဦးရေအချိုးအစားနဲ့  မြို့နယ်စီမံခန့်ခွဲအုပ်ချုပ်မှုပိုင်ဆိုင်ရာ ဖွဲ့စည်းပုံနဲ့မမျှတတော့ဘဲ စိန်ခေါ်မှုများစွာနဲ့ ရင်ဆိုင်နေရတယ်လို့ လှိုင်သာယာမြို့နယ် တိုင်းဒေသကြီး လွှတ်တော်ကိုယ်စားလှယ် ဦးဝင်းမောင်က ရှင်းလင်းပြောကြားခဲ့ပါတယ်။ တရားဥပဒေစိုးမိုးရေး၊ စည်ပင်သာယာရေး၊ ပညာရေး၊ ကျန်းမာရေးစတဲ့ မြို့နယ်ပြည်သူလူထုကို ၀န်ဆောင်မှုပေးနေရတဲ့ လုပ်ငန်းတွေမှာ ဌာနဆိုင်ရာ ၀န်ထမ်းလိုအပ်မှုတွေများစွာရှိနေပြီး အချို့အခြေခံပညာကျောင်းတွေမှာဆို ကျောင်းသားတွေထောင်ချီရှိနေတဲ့ အခြေအနေတွေထိရှိနေတယ်လို့ ဆိုပါတယ်။ ဒါ့ကြောင့် လှိုင်သာယာမြို့နယ်ကို တရားဥပဒေစိုးမိုးပြီးစိတ်ချလုံခြုံဖွံ့ဖြိုးတိုးတက်တဲ့မြို့သစ်တစ်ခုအဖြစ် ဖြစ်ပေါ်လာအောင်  အထောက်အကူပြုနိုင်ဖို့ မေးမြန်းရတာဖြစ်တယ်လို့ ဦးဝင်းမောင်က ပြောပါတယ်။

မြို့နယ်စီမံခန့်ခွဲအုပ်ချုပ်မှုပိုင်းဆိုင်ရာဖွဲ့စည်းပုံနဲပတ်သက်လို့ လှိုင်သာယာမြို့နယ်ကို အခြားမြို့နယ်တွေထက် ရဲတပ်ဖွဲ့အပါအ၀င် ဌာနဆိုင်ရာဝန်ထမ်းအင်အားတွေကို တိုးမြှင့်ချထားပေးခဲ့ပြီး လက်ရှိမှာ တရားဥပဒေစိုးမိုးရေးနဲ့ ပြည်သူ့ဝန်ဆောင်မှုလုပ်ငန်းတွေကို လုပ်ကိုင်နေတယ်လို့ သိရပါတယ်။ ဒါ့ကြောင့် လှိုင်သာယာမြို့နယ်ကို လူမှုရေး၊ စီးပွားရေး၊ အုပ်ချုပ်ရေး ရှု့ထောင့်များအရ ရန်ကုန်မြောက်ပိုင်းခရိုင်ရဲ့ စီမံခန့်ခွဲမှုနဲ့လက်လှမ်းမီတဲ့နေရာမှာတည်ရှိနေလို့ လတ်တလောအချိန်မှာ ခရိုင်အဆင့်တိုးမြှင့်သတ်မှတ်ပေးနိုင်ဖို့ အစီအစဉ်မရှိသေးဘူးလို့ ရန်ကုန်တိုင်းဒေသကြီးအစိုးရအဖွဲ့က ပြန်လည်ဖြေကြားခဲ့ပါတယ်။

လှိုင်သာယာမြို့နယ်မှာ ရပ်ကွက်(၂၀)၊ ကျေးရွာအုပ်စု(၉)ခုနဲ့ဖွဲ့စည်းထားကာ ဧရိယာစတုရန်မိုင်ပေါင်း(၂၆)မိုင် ကျော်ကျယ်ဝန်းတယ်လို့ သိရပါတယ်။ လှိုင်သာယာမြို့နယ်ဟာ ရန်ကုန်တိုင်းဒေသကြီးအတွင်း လူဦးရေ အများဆုံးမြို့နယ်ဖြစ်ပြီး လူဦးရေ(၁)သန်းခန့်နေထိုင်တယ်လို့ သိရပါတယ်။ ဒီပမာဏဟာ ကယား၊ချင်းစတဲ့ ပြည်နယ်တွေမှာနေထိုင်တဲ့ လူဦးရေစာရင်းနဲ့ အနည်းငယ်သာကွာခြားမှုရှိတော့တယ်လို့ သိရပါတယ်။ လှိုင်သာယာမြို့နယ်မှာ တရားဝင်အိမ်ထောင်စုစာရင်း (၆၆၀၀၀)ကျော်ရှိပြီး အိမ်ထောင်စုစာရင်းမရှိဘဲ နေထိုင်နေတဲ့အိမ်ထောင်စုတွေက တစ်သိန်းကျော်ရှိတယ်လို့ သိရပါတယ်။ မြို့နယ်အတွင်း စက်မှုဇုံ(၁၃)ဇုံ ရှိပြီး မွေးမြူရေးဇုံတွေလည်းရှိတယ်လို့ သိရပါတယ်။ ကျူးကျော်နေအိမ်(၅)သောင်းဝန်းကျင်၊ စီးပွားဖြစ်လုပ်ကိုင်နေတဲ့ လူနေအဆောင်တွေကလည်း အဆောင်တစ်သောင်းခန့်ရှိတယ်လို့သိရပါတယ်။

 

 

Related News