ပြည်ထောင်စုတရားလွှတ်တော်ချုပ်အနေနဲ့ မျက်မြင်သက်သေများကို အကာအကွယ်ပေးနိုင်သည့် ဥပဒေတစ်ရပ်ကိုသီးခြားရေးဆွဲ ပြဋ္ဌာန်းရန် အစီအစဉ်မရှိကြောင်း ဇူလိုင်လ (၁၈)ရက်က ပြုလုပ်ခဲ့တဲ့ ဒုတိယအကြိမ် ပြည်သူ့ လွှတ်တော်(၁၃) ကြိမ်မြောက် ပုံမှန်အစည်းအဝေး ဒုတိယနေ့မှာ ပြောကြားခဲ့တာပါ။

ပြည်သူ့လွှတ်တော် အစည်းအဝေးမှာ ဖောင်းပြင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးထွန်းဝေက မျက်မြင်သက်သေ များကို အကာအကွယ်ပေးနိုင်သည့် ဥပဒေတစ်ရပ် ရေးဆွဲပြဋ္ဌာန်းရန် အစီအစဉ်ရှိ၊ မရှိမေးမြန်းခဲ့တာပါ။ အဆိုပါ မေးမြန်းခွန်းနှင့် စပ်လျဉ်း၍ ပြည်ထောင်စုတရားလွှတ်တော်ချုပ်တရားသူကြီး ဦးအောင်ဇော်သိန်းက နိုင်ငံအတွင်းရှိ တည်ဆဲဥပဒေ အသီးသီးမှာ သက်သေများကို အကာအကွယ်ပေးရန် ထည်သွင်းပြဋ္ဌာန်းပြီးဖြစ်၍ ပြည်ထောင်စုတရား လွှတ်တော်ချုပ်အနေနဲ့ သက်သေများကို အကာအကွယ် ပေးနိုင်သည့် ဥပဒေတစ်ရပ်ကိုသီးခြားရေးဆွဲပြဋ္ဌာန်းရန် အစီအစဉ်မရှိပါကြောင်း ပြန်လည်ဖြေကြားခဲ့တာပါ။

ဖောင်းပြင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးထွန်းဝေက ယခုမေးခွန်းဟာ မိမိ မဲဆန္ဒနယ်မြေအတွင်း တွေ့ကြုံရတဲ့ ရာဇ၀တ်မှုများအပေါ်မှာ အခြေခံမေးမြန်းခဲ့တာဖြစ်တယ်လို့ ဆိုပါတယ်။ မျက်မြင်သက်သေများဟာ တရားရုံးများရဲ့နား၊ မျက်စိတွေ ဖြစ်ပြီး မျက်မြင်သက်သေတွေအနေနဲ့ ခြိမ်းခြောက်ခံရ၍ဖြစ်စေ မှားယွင်းတဲ့သက်သေခံချက်ကိုထွက်ဆိုဖို့ အကြပ်ကိုင်ခံရ၍ ဖြစ်စေ မျှတတဲ့ တရားစီရင်မှု မရရှိနိုင်တာကြောင့် မျက်မြင်သက်သေများကိုအကာအကွယ်ပေးနိုင်သည့် ဥပဒေတစ်ရပ်ရေးဆွဲ ပြဋ္ဌာန်းပေးဖို့ မေးမြန်းခဲ့တာလို့ ပြောပါတယ်။

မြန်မာနိုင်ငံရဲ့ ပြဋ္ဌာန်းပြီးတည်ဆဲ ဥပဒေများဖြစ်တဲ့ လူကုန်ကူးမှုတားဆီးကာကွယ်ရေးဥပဒေ၊ မူးယစ်ဆေးဝါးဥပဒေ၊ ကလေးသူငယ်ဥပဒေနဲ့ အဂတိလိုက်စားမှုတိုက်ဖျက်ရေးဥပဒေအပါအ၀င် အခြားဥပဒေများမှာလည်း  မျက်မြင်သက်သေများ၊ သတင်းပေးသူများ၊ နစ်နာသူ(သို့မဟုတ်) တိုင်ကြားသူများကို အကာအကွယ် ပေးနိုင်ဖို့ရာ အတွက် ပြဋ္ဌာန်းချက်များ ထည့်သွင်း ပြဋ္ဌာန်းထားတယ်လို့သိရပါတယ်။

 

 

Related News