မကူးစက်နိုင်သော ရောဂါများကာကွယ်တားဆီးသွားရန်အတွက် ၀န်ကြီးဌာနပေါင်းစုံ တက်တက်ကြွကြွ ပူးပေါင်းဆောင်ရွက်သွားရန် နိုင်ငံတော်အစိုးရအားတိုက်တွန်းကြောင်းအဆိုကို သြဂုတ်လ(၈)ရက်ကပြုလုပ်ခဲ့တဲ့ ဒုတိယအကြိမ်ပြည်သူ့လွှတ်တော်(၁၃)ကြိမ်မြောက် ပုံမှန်အစည်းအဝေးမှာ တင်သွင်းခဲ့ပြီး ဆက်လက်ဆွေးနွေးသွားမယ်လို့ သိရပါတယ်။ 

အဆိုကို ရေကြည်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါက်တာဦးစံရွှေဝင်းက တင်သွင်းခဲ့တာပါ။ မြန်မာနိုင်ငံမှာ မကူးစက် နိုင်သော ရောဂါများကြောင့် သေဆုံးမှုနှုန်းဟာ(၂၀၁၄)ခုနှစ်က (၄၈)ရာခိုင်နှုန်းသာရှိခဲ့ပေမယ့် (၂၀၁၇) ခုနှစ်မှာ (၅၂) ရာခိုင်နှုန်းအထိ တိုးမြှင့်လာခဲ့တယ်လို့ သိရပါတယ်။ မကူးစက်နိုင်ရောဂါတွေဟာ အဓိကအားဖြင့် ဆေးလိပ်၊ ဆေးရွက်ကြီးသုံးစွဲမှု များပြားခြင်း၊ အရက် အလွန်အကျွံသောက်သုံးခြင်း၊ အသင့်စားသုံးနိုင်သောအစားအသောက်များ စားသုံးမှုများပြားလာခြင်းအပါအ၀င် ပြည်သူလူထုရဲ့ ကိုယ်လက်လှုပ်ရှားမှု အားနည်းခြင်းတို့ကြောင့်ဖြစ်ပွားနေရတယ်လို့ ရေကြည်မဲဆန္ဒနယ်က ပြည်သူ့လွှတ်တော် ကိုယ်စားလှယ် ဒေါက်တာ ဦးစံရွှေဝင်းက ပြောပါတယ်။

ရေကြည်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါက်တာဦးစံရွှေဝင်း တင်သွင်းခဲ့တဲ့ အဆိုအပေါ်  အင်္ဂပူ မဲဆန္ဒနယ်မှ ပြည်သူ့လွှတ်တော်ကိုယ်စားလှယ်ဦးအေးဝင်းက ထောက်ခံတင်ပြခဲ့ပါတယ်။ မကူးစက်နိုင်ရောဂါများဟာ နာတာရှည်ရောဂါများဖြစ်ပြီး ရောဂါခံစားရုံသာမက ဆေးဝါးကုသမှုတွေအတွက် ငွေကြေးများကုန်ကျသလို လူမှုရေး၊ စီးပွားရေးတွေကိုလည်း ထိခိုက်စေတယ်လို့ သိရပါတယ်။ မကူးစက်နိုင်သောရောဂါများဖြစ်ပွားရခြင်းရဲ့ အဓိကအကြောင်းရင်းဖြစ်တဲ့ ဆေးလိပ်၊ ဆေးရွက်ကြီးနဲ့အရက်ယမကာများ သုံးစွဲမှုကို ထိန်းချုပ်နိုင်ပါက ရောဂါဖြစ်ပွားမှုကို လျော့နည်းကျဆင်း သွားနိုင်မှာဖြစ်တယ်လို့ အင်္ဂပူမဲဆန္ဒနယ်မှ ပြည်သူ့လွှတ်တော် ကိုယ်စားလှယ်ဦးအေးဝင်းကပြောပါတယ်။

မကူးစက်နိုင်သော ရောဂါများကာကွယ်တားဆီးသွားရန်အတွက် ၀န်ကြီးဌာနပေါင်းစုံ တက်တက်ကြွကြွ ပူးပေါင်းဆောင်ရွက်သွားရန် နိုင်ငံတော်အစိုးရအားတိုက်တွန်းကြောင်းအဆိုကို ဆွေးနွေးလိုတဲ့ လွှတ်တော် ကိုယ်စားလှယ်တွေအနေနဲ့ ဒီနေ့ သြဂုတ်လ (၉)ရက် နောက်ဆုံးထားအမည်စာရင်းတင်သွင်းဖို့ တောင်းခံထားတယ်လို့သိရပါတယ်။

 

 

Related News