နယ်စပ်ရေးရာဝန်ကြီးဌာန အနေနဲ့ ပြီးခဲ့တဲ့ တစ်နှစ်တာကာလအတွင်း နယ်စပ်ဒေသနဲ့ တိုင်းရင်းသားလူမျိုးတွေ ဖွံ့ဖြိုးတိုးတက်ရေးအတွက် ငွေကျပ် (၈၄)ဘီလီယံကျော် သုံးစွဲပြီး အကောင်အထည်ဖော်ဆာင်ရွက်ခဲ့တယ်လို့ နယ်စပ်ရေးရာဝန်ကြီးဌာနကနေ သိရပါတယ်။ နယ်စပ်ရေးရာဝန်ကြီးဌာနအနေနဲ့ နေပြည်တော်မှာရှိတဲ့ ပြန်ကြားရေးဝန်ကြီးဌာနရုံးမှာ ဧပြီလ (၆)ရက်က ပြုလုပ်ခဲ့တဲ့ အစိုးရရဲ့ ပထမတစ်နှစ်တာကာလအတွင်းပြုပြင်ဆောင်ရွက်ခဲ့မှု များနဲ့ ပတ်သက်တဲ့ သတင်းစာရှင်းလင်းပွဲမှာ ပြောကြားခဲ့တာဖြစ်ပြီး တစ်နှစ်တာကာလအတွင်း စုစုပေါင်း ခွင့်ပြုရန်ပုံငွေထဲက ငွေကျပ် (၈၄ဒသမ၇၅၆) ဘီလီယံကို သုံးစွဲခဲ့တယ်လို့သိရပါတယ်။ 

နယ်စပ်ရေးရာဝန်ကြီးဌာနအနေနဲ့ သုံးစွဲခဲ့တဲ့ ဘဏ္ဍာငွေတွေကို ကိုယ်ပိုင်အုပ်ချုပ်ခွင့်ရ ဒေသတွေနဲ့ နယ်စပ်ဒေသတွေမှာ မြေလမ်း၊ကျောက်လမ်းနဲ့ ကတ္တရာလမ်းခင်းတာတွေ၊ တံတား ဆောက်ပေးတာနဲ့ စာသင်ကျောင်းဆောင်အသစ် ဆောက်ပေးတာတွေ၊ ရေရရှိရေးနဲ့ မီးလင်းရေး အတွက် သုံးစွဲတာတွေ အပါအ၀င်ငွေကျပ် (၆၈ဒသမ၂၆၂) ဘီလီယံနဲ့ လူ့စွမ်းအားအရင်းအမြစ် ဖွံ့ဖြိုးတိုးတက်ရေးတက္ကသိုလ်နဲ့ ကောလိပ်တွေနဲ့ သင်တန်းတွေအတွက် လိုအပ်တာတွေ ၀ယ်ယူဖို့ ငွေကျပ် (၁၆ ဒသမ ၄၉၄)ဘီလီယံ သုံးစွဲခဲ့တာဖြစ်တယ်လို့ ပြောပါတယ်။ နယ်စပ်ရေးရာဝန်ကြီးဌာနအနေနဲ့ တစ်နှစ်အတွင်း နိုင်ငံတကာနဲ့ ပူးပေါင်းဆောင်ရွက်တဲ့ စီမံကိန်း (၁၇)ခုနဲ့ ဘိန်းစိုက်ပျိုးမှုပပျောက်ရေး၊ စိုက်ပျိုးရေး၊ မွေးမြုရေး၊ ကျန်မာရေးနဲ့ လူစွမ်းအားအရင်းအမြစ် ဖွံ့ဖြိုးရေးတို့အတွက် လုပ်ဆောင်နေတယ်လို့ သိရပါတယ်။

 

 

 

Related News