ကုလသမဂ္ဂရဲ့ မြန်မာနိုင်ငံလူ့အခွင့်အရေးအခြေအနေဆိုင်ရာ အထူးအစီရင်ခံစာတင်သွင်းသူ မစ္စယန်ဟီလီအနေနဲ့ မြန်မာနိုင်ငံကို လာမယ့် ဇူလိုင်လ ၁၀ရက်နေ့ကနေ ၂၁ရက်နေ့အထိ (၁၂)ရက်ခရီးစဉ် အဖြစ်လာရောက်တော့မှာပါ။လာမယ့် 
အောက်တိုဘာမှာကျင်းပမယ့် ကုလသမဂ္ဂအထွေထွေညီလာခံမှာ တင်သွင်းမယ့် မြန်မာနိုင်ငံဆိုင်ရာ လူ့အခွင့်အရေးအစီရင်ခံစာအတွက် လာရောက်မှာဖြစ်ပါတယ်။ ၂၀၁၄ခုနှစ်ကစပြီး အခုတစ်ခေါက်နဲ့ဆို မစ္စယန်ဟီလီ မြန်မာနိုင်ငံကိုလာတာ ခြောက်ကြိမ်မြောက်ရှိပြီဖြစ်ပါတယ်။ မစ္စယန်ဟီလီရဲ့ အခုတစ်ခေါက်ခရီးစဉ်နဲ့ပတ်သတ်လို့ နိုင်ငံတော်သမ္မတရုံးကတော့ ဇူလိုင် ၇ရက်ကသတင်းထုတ်ပြန်ချက်တစ်ခုထုတ်ထားပါတယ်။ ကုလသမဂ္ဂလူ့အခွင့်အရေးကောင်စီရဲ့ အချက်အလက်ရှာဖွေဖော်ထုတ်ရေးမစ်ရှင် (Fact-Finding Mission) ကို မြန်မာနိုင်ငံအနေနဲ့လက်ခံမထားတာကြောင့် ယန်ဟီလီအနေနဲ့ အခုတစ်ခေါက် မြန်မာနိုင်ငံခရီးစဉ်အတွင်း သူမရဲ့မူလတာဝန်သာ လုပ်ဆောင်ဖို့နဲ့  Fact_Finding Mission နဲ့ပတ်သတ်တဲ့ လုပ်ပိုင်ခွင့်၊ တာဝန်နဲ့ ပတ်သတ်မှုမရှိစေဖို့ မြန်မာအစိုးရဘက်က အကြောင်းကြား ထားတယ်လို့ သိရပါတယ်။
 
မစ္စယန်ဟီလီဘက်ကလည်း သူမရဲ့မူလတာဝန်ဖြစ်တဲ့ အထူးအစီရင် ခံစာတင်သွင်း သူတာဝန်ကိုသာ ဆောင်ရွက်မှာဖြစ်တယ်လို့အကြောင်းပြန်ထားတာကြောင့် အခုခရီးစဉ်ကို လက်ခံထားတာ ဖြစ်တယ်လို့ နိုင်ငံတော်သမ္မတရုံးရဲ့ထုတ်ပြန်ချက်မှာပါဝင်ပါတယ်။ မစ္စယန်ဟီလီရဲ့ အခုတစ်ခေါက် မြန်မာနိုင်ငံခရီးစဉ်မှာတော့ နိုင်ငံတော်တာဝန်ရှိသူ တွေ၊ လူ့အခွင့်အရေး ဆိုင်ရာအဖွဲ့တွေ၊NGO တွေနဲ့တွေ့ဆုံဖို့ရှိနေသလို ရခိုင်၊ရှမ်းနဲ့ကရင်ပြည်နယ်တွေအပြင် ရန်ကုန်တိုင်း နဲ့ နေပြည်တော်ကိုလည်းသွားရောက်ဖို့ရှိတယ်လို့ ကုလသမ္မဂ္ဂသတင်း အချက်အလက်စင်တာ (ရန်ကုန်)က ထုတ်ပြန်ထားပါတယ်။ဒီတစ်ခေါက် သူ့ရဲ့ ၁၂ရက်တာခရီးစဉ်အတွင်း အထူးစီးပွားရေး ဇုန်တွေကြောင့် လူ့အခွင့်အရေးချိုးဖောက်ခံရမှုရှိမရှိပါ လေ့လာသွားမယ်လို့ ပြောပါတယ်။
 
မစ္စယန်ဟီလီအနေနဲ့ ရှမ်းပြည်နယ် နေရာ တော်တော်များများကိုသွားဖို့ မြန်မာအစိုးရဘက်ကို တင်ပြထားပေမယ့် လုံခြုံရေးအခြေအနေတွေကြောင့် အခက်အခဲတစ်ချို့ရှိ နေတယ်လို့လည်း သိရပါတယ်။အခုတစ်ခေါက်မြန်မာနိုင်ငံခရီးစဉ်က တွေ့ရှိချက်တွေကိုတော့ လာမယ့် အောက်တိုဘာလမှာ ပြုလုပ်မယ့် ကုလသမဂ္ဂ အထွေထွေညီလာခံမှာ အစီရင်ခံစာတင်သွင်းမှာ ဖြစ်ပါတယ်။ ကုလသမဂ္ဂလူ့အခွင့်အရေးကောင်စီအနေနဲ့ မြန်မာနိုင်ငံဆိုင်ရာ ကုလသမဂ္ဂရဲ့ လူ့အခွင့်အရေးကိုယ်စားလှယ်အဖြစ် မစ္စယန်ဟီလီကို ၂၀၁၄ခုနှစ်မှာစတင်ခန့်အပ်ခဲ့တာပါ။သူမအနေနဲ့ ပြီးခဲ့တဲ့ ၂၀၁၇ ဇန်န၀ါရီလ ၈ရက် နေ့က မြန်မာနိုင်ငံကို နောက်ဆုံးအကြိမ် လာရောက်ခဲ့တာဖြစ်ပြီး အဲ့ဒီ့တုန်းက ရခိုင်ပြည်နယ်၊ ကချင်ပြည်နယ် တို့ကိုသွားရောက်ခဲ့သလို ၊ကျောက်ထုတ်စခန်းတစ်ချို့နဲ့စစ်ဘေးရှောင်စခန်းတစ်ချို့ကိုလည်းသွားရောက်ခဲ့ပါတယ်။ဒါ့အပြင် နေပြည်တော်မှာ အစိုးရတာဝန်ရှိသူတွေနဲ့တွေ့ဆုံခဲ့ပြီး ရန်ကုန်မှာတော့ ငြိမ်းချမ်းရေးကော်မရှင်၊ မြန်မာနိုင်ငံအမျိုးသားလူ့အခွင့်အရေးကော်မရှင်တို့နဲ့တွေ့ဆုံခဲ့သလို အင်းစိန်အကျဉ်း ထောင်ကိုလည်း သွားရောက်ခဲ့ပါတယ်။
 

Related News