မြန်မာ့(အ)သုံးလုံး စေတနာ့ဝန်ထမ်း စာတတ်မြောက်ရေးအဖွဲ့ကြီးရဲ့ (၅၃)နှစ်မြောက် အထိမ်းအမှတ်အခမ်းအနားကို စက်တင်ဘာလ(၁၀)ရက်က ရန်ကုန်တက်္ကသိုလ်နယ်မြေ၊ တောင်ငူဆောင်၊ မြန်မာစာခန်းမမှာ ကျင်းပပြုလုပ်ခဲ့ပါတယ်။ ၁၉၆၄ခုနှစ်ကစတင်ခဲ့တဲ့  မြန်မာနိုင်ငံ စာတတ်မြောက်ရေး (အ)သုံးလုံးစေတနာ့ဝန်ထမ်းစာတတ်မြောက်ရေးလှုပ်ရှားမှုကြီးမှာ စေတနာ ထက်သန်စွာပါဝင်ထမ်းဆောင်ခဲ့ကြတဲ့ တက်္ကသိုလ်၊ကောလိပ်၊သိပ်္ပံကျောင်းပေါင်းစုံမှ အဖွဲ့ဝင်ဟောင်း များကို ငယ်ရွယ်စဉ်ကပြုလုပ်ခဲ့ကြတဲ့ ပြည်သူ့အကျိုးပြုလုပ်ငန်းများ ဆောင်ရွက်ခဲ့ တာကိုပြန်လည် အမှတ်ရစေပြီး (အ)သုံးလုံးအဖွဲ့ဝင် ဟောင်းများစုပေါင်းပြီး ပညာရေး၊ ကျန်းမာရေးနှင့် အခြားလူမှုရေးလုပ်ငန်းများကို စွမ်းနိုင်သမျှစုပေါင်းဆောင်ရွက်ကြရန်ရည်ရွယ်ပြီး အခုလို ကျင်းပပြုလုပ်ရတာဖြစ်တယ်လို့ ပြောပါတယ်။မြန်မာနိုင်ငံမှာ လူဦးရေ(၅၃)သန်းရှိတဲ့အနက် စာတတ်မြောက်သူဦးရေဟာ (၉၄.၅) ရာခိုင်နှုန်း ရှိတယ်လို့ သိရပါတယ်။
 
အခုလက်ရှိမှာတော့  စာတတ်မြောက်ရေးနှင့် ဒေသဖွံ့ဖြိုးမှု ကူညီရေးအဖွဲ့ အနေနဲ့ ပြည်နယ်နှင့်တိုင်းဒေသကြီး (၁၀)ခုမြို့နယ်၊ ကျေးလက် (၃၀)ကျော်ကို သွားရောက်ပြီး အခြေခံပညာကျောင်းတွေမှာ ပညာရည်နှင့်အောင်ချက်မြင့်မားရေးပို့ချခြင်း၊ အခမဲ့ ဆေးကုသပေးခြင်း၊ ဆေးဝါး၊ဆေးခန်းသုံးပစ်္စည်းများ၊ စာအုပ်စာတမ်းများနဲ့ စာရေးကိရိယာများ လှူဒါန်းခြင်း တွေအပြင်နွမ်းပါးသူတွေအတွက် အ၀တ်အထည်အသုံးအဆောင်တွေနဲ့ ကျန်းမာရေး စောင့်ရှောက်မှုတွေကိုပါ ပြုလုပ်ပေးနေတာဖြစ်တယ်လို့ သိရပါတယ်။ ဒါ့အပြင် ကိုယ်ကျင့်တရား ကောင်းမွန်ရေး၊ မူးယစ်ဆေးဝါးဆန့်ကျင်ရေးဟောပြောပွဲများကျင်းပခြင်း အိမ်တွင်းမှုပညာများ သင်ကြားပေးခြင်းစတဲ့လူမှုအကျိုးပြုလုပ်ငန်းတွေကိုလည်းဆောင်ရွက်ပေးလျက်ရှိတယ်လို့သိရပါတယ်။ စာတတ်မြောက်ရေးနှင့် ဒေသဖွံ့ဖြိုးမှုကူညီရေးအဖွဲ့ကို ၂၀၁၃ခုနှစ်က စတင်ဖွဲ့စည်းခဲ့တာဖြစ်ပြီး ပြည်ထောင်စုဒေသအနှံ့အပြားမှာ ပညာရေး၊ ကျန်းမာရေးနှင့် အခြားလူမှုရေးလုပ်ငန်းများကို စုပေါင်းဆောင်ရွက်ကြရန် ရည်ရွယ်ပြီး ဖွဲ့စည်းခဲ့တာဖြစ်တယ်လို့လည်းသိရပါတယ်။ 
 

Related News