ရန်ကုန်မှာ တစ်နှစ်ဝန်းကျင် တရားဝင်လိုင်စင်မရှိဘဲ  လုပ်ကိုင်နေကြတဲ့  ငွေရေးကြေးရေး အဖွဲ့အစည်းများရှိနေပြီး တရားဝင်လိုင်စင်မရှိဘဲလုပ်ကိုင်နေကြတဲ့ ငွေရေးကြေးရေးအဖွဲ့အစည်းတွေကို ဘယ်လိုအရေးယူဆောင်ရွက်မလဲဆိုတာကို အောက်တိုဘာ(၃)ရက်က တိုင်းဒေသကြီး လွှတ်တော်မှာ မေးမြန်းလိုက်ပါတယ်။ ရန်ကုန်တိုင်းဒေသကြီးအတွင်း တရားဝင်လိုင်စင်မရှိသေးဘဲ တစ်နှစ်ဝန်းကျင်ကြာ လုပ်ငန်း လုပ်ကိုင်နေကြတဲ့ ငွေရေးကြေးရေးအဖွဲ့အစည်းတွေရှိခဲ့ပြီး ဒါဟာနိုင်ငံတော်အတွက် အလွန်အန္တရာယ်ရှိတယ်လို့လဲ ဆိပ်ကြီးခနောင်တိုမြို့နယ် အမတ်ဒေါ်စန္ဒာမင်းက ပြောပါတယ်။ ဒါ့ကြောင့် ရန်ကုန်တိုင်းဒေသကြီးအတွင်း ကျယ်ပြန့်စွာဆောင်ရွက်နေတဲ့ ငွေရေးကြေးရေး အဖွဲ့အစည်းတွေဖြစ်တဲ့  OK  Pay, Wave Money, Ongo စတဲ့ လုပ်ငန်းတွေဟာ တရားဝင် လုပ်ပိုင်ခွင့်ရရှိထားခြင်း ရှိ၊မရှိ၊ တရားဝင်လုပ်ပိုင်ခွင့် လိုင်စင်မရှိသေးဘဲ လုပ်ကိုင်နေတဲ့  ငွေရေးကြေးရေးအဖွဲ့အစည်းတွေကို ဘယ်လိုဥပဒေတွေနဲ့ အရေးယူဆောင်ရွက်ခွင့်ပြုမလဲ ဆိုတာနဲ့ ဘယ်ငွေရေးကြေးရေးလုပ်ငန်းတွေက ဘယ်လုပ်ငန်းသဘောသဘာဝအောက်မှာ ရှိသလဲ ဆိုတာကို  ဒေါ်စန္ဒာမင်းက မေးမြန်းလိုက်တာပါ။
 
ဗဟိုဘဏ် မိုဘိုင်းပလက်ဖောင်းကို အသုံးပြုပြီးငွေရေးကြေးရေးဝန်ဆောင်မှုပေးတဲ့ လုပ်ငန်းတွေအနေနဲ့ နှစ်မျိုးရှိပြီးဘဏ်ဦးဆောင်မှုပုံစံနဲ့ ဆောင်ရွက်ခွင့်ပြုတဲ့ မိုဘိုင်းဘဏ်လုပ်ငန်းနဲ့ မိုဘိုင်းငွေရေး ကြေးရေးဝန် ဆောင်မှုလုပ်ငန်းတို့ဖြစ်တယ်လို့ ရန်ကုန်တိုင်းဒေသကြီး စီမံကိန်းနဲ့ ဘဏ္ဍာရေးဝန်ကြီး ဦးမြင့်သောင်းက ပြောပါတယ်။ ဒီလုပ်ငန်းတွေဟာ တားမြစ်ချက် တစ်ရပ်ရပ်ကို ကျူးလွန်မိရင် ငွေရေးကြေးရေးအဖွဲ့အစည်းများဥပဒေနဲ့ အရေးယူဆောင်ရွက်နိုင်ပြီး အနည်းဆုံး (၂)နှစ်ကနေ (၅)နှစ်ထက်မပိုတဲ့ ထောင်ဒဏ်ချမှတ်ရမည့်အပြင် ဒဏ်ငွေကျပ်သန်း(၅၀၀) ထက်မပိုသော ငွေဒဏ်ကိုလဲချမှတ်ရမှာဖြစ်သလို နိုင်ငံခြားသုံးငွေစီမံခန့်ခွဲမှုဥပဒေနဲ့လည်း အရေးယူ ဆောင်ရွက်နိုင်ပြီး အနည်းဆုံး(၃)နှစ်ထက်မပိုတဲ့ ထောင်ဒဏ်ဖြစ်စေ၊ ဒဏ်ငွေဖြစ်စေ ရမှတ်ရမည့် အပြင် သက်သေခံပစ္စည်းကိုလဲ ပြည်သူ့ဘဏ္ဍာအဖြစ် သိမ်းဆည်းရမယ်လို့လဲ ၀န်ကြီးကဆိုပါတယ်။
 
OK  Pay  နဲ့ Wave Money  ကတော့ လုပ်ငန်းအမည်တွေသာဖြစ်ပြီး မိုဘိုင်းငွေရေးကြေးရေး ၀န်ဆောင်မှုလုပ်ငန်းအဖြစ် ဆောင်ရွက်ခွင့်ရထားတာဖြစ်ပြီး ပြည်ထောင်စုမြန်မာနိုင်ငံတော် ဗဟိုဘဏ်က ၂၈ရက် ၉လ၂၀၁၆ နဲ့ ၃၁ရက် ၈လ ၂၀၁၇ က မှတ်ပုံတင်အသီးသီးချထားပေးခဲ့ တာဖြစ်သလို သက်ဆိုင်ရာစည်းမျဉ်း စည်းကမ်းအရ လုပ်ငန်းဆောင်ရွက်ခွင့် ခွင့်ပြုထားပြီး ဖြစ်တယ်လို့လဲ ၀န်ကြီးကပြောပါတယ်။ Ongo ကတော့ မြန်မာ့အရှေ့တိုင်းဘဏ်နဲ့ ပူးပေါင်းပြီးတော့  ဘဏ်ဦးဆောင်တဲ့ မိုဘိုင်းဘဏ် လုပ်ငန်းဆောင်ရွက်ဖို့အတွက်ကို ဗဟိုဘဏ်ကို လျှောက်ထားလျက်ရှိပြီး ဗဟိုဘဏ်မှ မြန်မာ့ အရှေ့တိုင်းဘဏ်ရဲ့ ဘဏ်ဝန်ဆောင်မှုတစ်ရပ်အနေနဲ့ ဆောင်ရွက်ခွင့်ပြုဖို့ စိစစ်လျက်ရှိ တယ်လို့လဲ သိရပါတယ်။ 
 
 

Related News