ပြည်ထောင်စုသမ္မတမြန်မာနိုင်ငံတော်၏ သဘာဝသယံဇာတများ ပျက်စီးဆုံးရှုံးနေခြင်းကို အမျိုးသားရေးတာဝန်တစ်ရပ်အနေဖြင့် ထိန်းသိမ်းကာကွယ်စောင့်ရှောက်ပေးရန် ပြည်ထောင်စုအစိုးရအား 
တိုက်တွန်းကြောင်းအဆိုကို အမျိုးသားလွှတ်တော်က အတည်ပြုလိုက်ပါတယ်။ရန်ကုန်တိုင်းဒေသကြီး မဲဆန်္ဒနယ်အမှတ်(၉)က အမျိုးသားလွှတ်တော် ကိုယ်စားလှယ် ဦးဖေချစ် တင်သွင်းခဲ့တဲ့ ပြည်ထောင်စုသမ္မတမြန်မာနိုင်ငံတော်ရဲ့ သဘာဝသယံဇာတတွေ ပျက်စီးဆုံးရှုံး နေခြင်းကို အမျိုးသားရေး တာဝန်တစ်ရပ်အနေနဲ့ ထိန်သိမ်း ကာကွယ်စောင့်ရှောက်ပေးဖို့  ပြည်ထောင်စု အစိုးရအားတိုက်တွန်းတဲ့အဆိုကို ဖေဖော်ဝါရီလ၁၄ရက်က ပြုလုပ်တဲ့ ဒုတိယအကြိမ် အမျိုးသားလွှတ်တော် သတ္တမ ပုံမှန်အစည်းအဝေးမှာ လွှတ်တော်ကိုယ်စားလှယ်တွေက ဆွေးနွေးခဲ့ပြီး အတည်ပြုလိုက်တာပါ။
 
အဆိုအပေါ် အမျိုးသားလွှတ်တော် လွှတ်တော်ကိုယ်စားလှယ် ၂၅ဦးက ဆွေးနွေးခဲ့ကာ ပြည်ထောင်စု အစိုးရအဖွဲ့ကိုယ်စား သယံဇာတနှင့်သဘာဝပတ်ဝန်းကျင်ထိန်းသိမ်းရေး ၀န်ကြီးဌာန ပြည်ထောင်စုဝန်ကြီး ဦးအုန်းဝင်းကပြန်လည်ရှင်းလင်းဖြေကြားခဲ့ပြီး မှတ်တမ်းအဖြစ်သာ ထားရှိဖို့တင်ပြခဲ့ပါတယ်။ ဒါပေမယ့် အဆိုရှင်ဖြစ်တဲ့ ဦးဖေချစ်က အတည်ပြုဖို့ တင်ပြခဲ့တာကြောင့် အမျိုးသားလွှတ်တော်မှာ မဲခွဲဆုံးဖြတ်ရာ ထောက်ခံမဲ ၉၂ မဲ၊ ကန့်ကွက်မဲ ၈၂ မဲနဲ့ ကြားနေမဲ ၄မဲ ရှိခဲ့ကာ ထောက်ခံသူများပြားခဲ့တာကြောင့် အတည်ပြုလိုက်တာပါ။
 
ယခုအတည်ပြုလိုက်တဲ့ အဆိုအပေါ် ဆွေးနွေးခဲ့ကြတဲ့ အမျိုးသားလွှတ်တော်ကိုယ်စားလှယ်တွေ အနေနဲ့ မိမိတို့မဲဆန္ဒနယ်တွေမှာ သဘာဝသယံဇာတတွေ ပျက်စီးဆုံးရှုံးနေတာတွေကို ထိန်းသိမ်းဖို့ ရင်ဆိုင်ကြုံတွေ့နေရတဲ့ အခက်အခဲတွေနဲ့ ပတ်သက်ပြီး ထောက်ပြဆွေးနွေးသွားခဲ့ကြပါတယ်။ ဒါ့အပြင် သဘာဝသယံဇာတတွေ ပျက်စီးဆုံးရှုံးနေတာတွေကို ထိန်းသိမ်းကာကွယ်ဖို့ ပြည်ထောင်စုအစိုးရ သာမကပဲ လွှတ်တော်အသီးသီးအပါအ၀င် Stake Holder တွေ သဘာဝပတ်ဝန်းကျင်နဲ့ ပတ်သက် ဆက်နွယ်တဲ့ အဖွဲ့အစည်းတွေနဲ့ တိုင်းရင်းသားပြည်သူတစ်ရပ်လုံးကပူးပေါင်းဆောင်ရွက်ဖို့ လိုအပ်တဲ့ အကြောင်းတွေကိုဆွေးနွေးသွားခဲ့ကြပါတယ်။ 
 
ရန်ကုန်တိုင်းဒေသကြီး မဲဆန္ဒနယ်အမှတ်(၉)က အမျိုးသားလွှတ်တော် ကိုယ်စားလှယ် ဦးဖေချစ်ရဲ့ ပြည်ထောင်စုသမ္မတမြန်မာနိုင်ငံတော်ရဲ့ သဘာဝသယံဇာတတွေပျက်စီးဆုံးရှုံးနေခြင်းကို အမျိုးသား ရေးတာဝန်တစ်ရပ်အနေနဲ့ ထိန်သိမ်းကာကွယ်စောင့်ရှောက်ပေးဖို့ ပြည်ထောင်စုအစိုးရအား တိုက်တွန်းတဲ့အဆိုကို အမျိုးသားလွှတ်တော်မှာ ဇန်န၀ါရီလ ၂၃ရက်က တင်သွင်းခဲ့တာပါ။
 
 
 
 

Related News