ရန်ကုန်တိုင်းဒေသကြီးအတွင်းရှိ ရပ်ကွက်ကျေးရွာအုပ်ချုပ်ရေးမှူးရုံးတွေမှာ ဈေးဆိုင်ခန်းငှားရမ်းထားတာတွေကို စုံစမ်းစစ်ဆေးရေးအဖွဲ့ ဖွဲ့စည်းကာ စစ်ဆေးသွားမယ်လို့ ရန်ကုန်တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးအောင်စိုးမိုး ကပြောကြားလိုက်ပါတယ်။ ရန်ကုန်တိုင်းဒေသကြီးအတွင်းရှိ ရပ်ကွက်အုပ်ချုပ်ရေးမှူးရုံးခန်းတစ်ချို့မှာ ရန်ပုံငွေအကြောင်းပြချက်နဲ့ ရုံးဧရိယာအတွင်း ဆိုင်ခန်းနေရာငှားရမ်းနေတာတွေကို ခွင့်ပြုထားတာရှိ၊မရှိနဲ့  ခွင့်ပြုထားရင် အမြန်ဖယ်ရှား ဆောင်ရွက်ပေးဖို့ကို လွှတ်တော်ကိုယ်စားလှယ် ဦးကျော်မင်းဟန်က မတ်လ(၁၂)ရက်က တိုင်းလွှတ်တော်မှာ မေးမြန်းခဲ့တာပါ။

ရပ်ကွက်အုပ်ချုပ်ရေးမှူးရုံးတွေဟာ  အထွေထွေအုပ်ချုပ်ရေးဦးစီးဌာနရဲ့ ခွင့်ပြုရန်ပုံငွေနဲ့ ဆောက်လုပ်တာမဟုတ်ဘဲ ကန်ထရိုက်နဲ့ အကျိုးတူဆောက်လုပ်တာ၊ ရပ်ကွက်နေပြည်သူတွေက ထည့်ဝင်ပေးတဲ့ အလှူငွေတွေနဲ့ ဆောက်လုပ်တာတွေ တွေ့နေရတယ်လို့ ၀န်ကြီးကပြောပါတယ်။ ရပ်ကွက်သာရေး၊ နာရေး၊ လူမှုရေးလုပ်ငန်းတွေမှာ ထောက်ပံကြေးပြုလုပ်ဖို့ သဘောတူညီချက်တွေနဲ့ ငှားရမ်းတာတွေ၊ ရရှိတဲ့ငွေတွေကို ရပ်ကွက်ရုံးအဆောက်အဦး ဆောက်လုပ်ချိန်မှာ တစ်စိတ်တပိုင်း ထည့်သွင်းသုံးစွဲနိုင်ရေးအတွက် ရပ်ကွက်အုပ်ချုပ်ရေးမှူးရုံးက အစီအစဉ်နဲ့သာ ဆောင်ရွက်နေတာဖြစ်တယ် လို့လည်းဆိုပါတယ်။

မေးခွန်းနဲ့ပတ်သက်လို့တော့ လက်ရှိ ဆိုင်ခန်းနေရာတွေငှားရမ်းထားတဲ့ ရပ်ကွက်အုပ်ချုပ်ရေးမှူးရုံးတွေက ဆိုင်ခန်းတစ်ခန်းချင်းစီကို စုံစမ်းစစ်ဆေးရေးအဖွဲ့ ဖွဲ့စည်းပြီး စစ်ဆေးသွား မယ်လို့ ၀န်ကြီးကပြောကြားလိုက်သလို စစ်ဆေးတွေ့ရှိချက်တွေကို စိစစ်ပြီး ဆက်လက်ဆောင်ရွက်သွား မယ်လို့လည်းပြောပါတယ်။လက်ရှိ ရန်ကုန်တိုင်းဒေသကြီးအတွင်း အရှေ့ပိုင်ခရိုင်က ရပ်ကွက်ရုံး(၄)ရုံးမှာ ဆိုင်ခန်း(၁၇)ခန်း၊ တောင်ပိုင်းခရိုင်က ရပ်ကွက်ရုံး(၁)ရုံးမှာ (၃)ခန်း၊ မြောက်ပိုင်းခရိုင်က ရပ်ကွက်ရုံး(၂)ရုံးမှာ (၇)ခန်း၊ စုစုပေါင်းရပ်ကွက်ရုံး(၇)ရုံးမှာ ဆိုင်ခန်း(၂၇)ခန်းရှိပြီး အနောက်ပိုင်း ခရိုင်က ရပ်ကွက်ရုံးတွေမှာတော့ ငှားရမ်းထားတာမရှိဘူးလို့လည်း သိရပါတယ်။ တိုင်းဒေသကြီး အတွင်းက ခရိုင် နဲ့  မြို့နယ်အထွေထွေအုပ်ချုပ်ရေးမှူးရုံးတွေမှာတော့ ဆိုင်ခန်းတွေ ဖွင့်လှစ်ထား ရှိခြင်း မရှိဘူးလို့ သိရပါတယ်။

 

 

Related News