ရန်ကုန်တိုင်းဒေသကြီးရှိ ပုဂ္ဂလိက ဆေးရုံ၊ ဆေးခန်းတွေကို တိုင်းဒေသကြီးပုဂ္ဂလိက ကျန်းမာရေးလုပ်ငန်းဆိုင်ရာ ကြီးကြပ်မှုကော်မတီက ရှောင်တခင်ကွင်းဆင်းစစ်ဆေးခဲ့ပြီး တရားမ၀င် ဆေးဝါးတွေဖမ်းဆီးရမိတဲ့ ပုဂ္ဂလိကဆေးခန်းနှစ်ခုကို ပိတ်သိမ်းအရေးယူထားတယ်လို့ အဆိုပါ ကြီးကြပ်မှုကော်မတီရဲ့ အတွင်းရေးမှူးက ပြောပါတယ်။ ပုဂ္ဂလိကဆေးခန်းတွေဖြစ်တဲ့ လှိုင်မြို့နယ်မှ ရောင်နီဦးဆေးခန်းနဲ့ လမ်းမတော်မြို့နယ်မှ နေ၀န်းဆေးခန်းတို့မှာ တရားမ၀င်ဆေးဝါးတွေ သိုလှောင်ထားတာကို စစ်ဆေးတွေ့ရှိခဲ့တာကြောင့် အမျိုးသားဆေးဝါးဥပဒေနဲ့ အရေးယူပြီး ဆေးခန်းတွေကို ပိတ်သိမ်းခိုင်းထားတယ်လို့ သိရပါတယ်။

ဖမ်းဆီးအရေးယူခံရတဲ့ ဆေးခန်းနှစ်ခုထဲမှ တစ်ခုဖြစ်တဲ့ နေ၀န်း(SUN) ဆေးခန်းမှာတော့ ဆေးကုသခွင့် လိုင်စင်မရှိပဲ တရားမ၀င် ဆေးကုသနေတဲ့ တရုတ်နိုင်ငံသားကိုပါ စစ်ဆေးတွေ့ရှိခဲ့တာကြောင့်  မြန်မာနိုင်ငံဆေးကောင်စီ ဥပဒေအရပါ ပူးတွဲအရေးယူထားတယ်လို့ ကြီးကြပ်မှုကော်မတီရဲ့ အတွင်းရေးမှူးက ပြောပါတယ်။ ရန်ကုန်တိုင်းဒေသကြီးလူမှုရေးဝန်ကြီး ဦးနိုင်ငံလင်း ဥက္ကဋ္ဌအဖြစ်ဦးဆောင်တဲ့ တိုင်းဒေသကြီး ပုဂ္ဂလိက ကျန်းမာရေးလုပ်ငန်းဆိုင်ရာ ကြီးကြပ်ကော်မတီက မတ်လကနေ မေလအတွင်း ပုဂ္ဂလိက ဆေးခန်းခြောက်ခုကို ရှောင်တခင် ၀င်ရောက်စစ်ဆေးခဲ့တာ ဖြစ်ပါတယ်။

အဆိုပါစစ်ဆေးခဲ့တဲ့ ဆေးခန်းခြောက်ခုထဲမှ တရားမ၀င်ဆေးခန်းနှစ်ခုကိုတော့ ပိတ်သိမ်းအရေးယူခဲ့ပြီး ပြည်သူတွေ တိုင်ကြားလာတဲ့ ဆေးခန်းတွေနဲ့ အလွန်အကျူး ကြော်ငြာတဲ့ ဆေးခန်းတွေကိုလည်း ရှောင်တခင် ၀င်ရောက်စစ်ဆေးသွားမယ်လို့သိရပါတယ်။ တိုင်းဒေသကြီးပုဂ္ဂလိက ကျန်းမာရေးလုပ်ငန်းဆိုင်ရာ ကြီးကြပ်မှုကော်မတီနဲ့ ကိုယ်ပိုင်ဆေးကု ဂေဟာများတွေ့ဆုံပွဲကို မေလ(၁၇)ရက်က တိုင်းကျန်းမာရေးဦးစီးဌာနမှာ ပြုလုပ်ခဲ့ပြီး ပုဂ္ဂလိကဆေးခန်း ခုနစ်ခုတက်ရောက်ခဲ့ပါတယ်။ ရန်ကုန်တိုင်းဒေသကြီးအတွင်းမှာ တရားဝင်လိုင်စင်ရရှိထားတဲ့ ပုဂ္ဂလိက အထူးကုဆေးခန်းနဲ့ အထွေထွေရောဂါကုဆေးခန်းစုစုပေါင်း သုံးထောင်နီးပါးရှိတယ်လို့ သိရပါတယ်။  

 

 

Related News