လာမယ့် ဇွန်(၂၆)ရက်ဟာ အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမ၀င် ရောင်းဝယ်မှုတိုက်ဖျက်ရေးနေ့ဖြစ်ပြီး အဆိုပါနေ့မှာ ပြည်တွင်းက ဖမ်းဆီးရမိတဲ့မူးယစ်ဆေးဝါးတွေကို 
နှစ်စဉ်မီးရှို့ဖျက်ဆီးနေတာဖြစ်ပါတယ်။ ဒီနှစ်မှာနေတော့ ရန်ကုန်တိုင်း ဒေသကြီးအတွင်း မီးရှို့ဖျက်ဆီးဖို့ မူးယစ်ဆေးဝါးအမှုပေါင်း(၆၀၀)နီးပါး အမှုပြီးပြတ်ချက်ရရှိထားပြီး ဖြစ်တယ်လို့ ရန်ကုန်တိုင်းဒေသကြီး ရဲတပ်ဖွဲ့ကပြောပါတယ်။ 
 
အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမ၀င်ရောင်းဝယ်မှုတိုက်ဖျက်ရေးနေ့ အထိမ်းအမှတ်အဖြစ် နှစ်စဉ်ဖမ်းဆီးရမိတဲ့ မူးယစ်ဆေးဝါးတွေအနက်   အမှုပြီးပြတ်ချက်ရရှိပြီး သွားတဲ့ အမှုတွေကမူးယစ်ဆေးဝါးတွေကို မီးရှို့ဖျက်ဆီးနေတာဖြစ်ပါတယ်။ ပြည်တွင်းမှာ ရန်ကုန်၊မန်္တလေး၊တောင်ကြီးစတဲ့ (၃)နေရာမှာ နှစ်စဉ် မူးယစ်ဆေးဝါးတွေကို မီးရှို့ဖျက်ဆီးနေတာပါ။
 
ယခုနှစ်  အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမ၀င်ရောင်းဝယ်မှု တိုက်ဖျက်ရေး နေ့မှာတော့ ရန်ကုန်တိုင်းဒေသကြီးအပါအ၀င် အခြားတိုင်းဒေသကြီးနှင့်ပြည်နယ်(၇)ခု၊ အမြန်လမ်း ၊နယ်ခြားစောင့်တပ်ဖွဲ့စတဲ့ တပ်ဖွဲ့(၉)ဖွဲ့က   တစ်နှစ်တာ ဖမ်းဆီးရမိခဲ့တဲ့ မူးယစ်ဆေးဝါးမျိုးစုံကို မီးရှို့ဖျက်ဆီးသွားမှာဖြစ်ပါတယ်။ ရန်ကုန်တိုင်းဒေသကြီးတစ်ခုထဲကပဲ လက်ရှိအမှုပေါင်း(၆၀၀)နီးပါး အမှုပြီးပြတ်ချက်ရရှိပြီးသွားပြီးလို့ တိုင်းဒေသကြီးရဲတပ်ဖွဲ့က ပြောကြားပါတယ်။မူးယစ်ဆေးဝါး အမျိုးအစား ၊အလေးချိန်ပမာဏတွေနဲ့ တန်ဖိုးငွေတွေကိုတော့ မသိရှိရသေးပေမယ့် ဒုတိယအကြိမ်ပြုလုပ်မယ့် အစည်းအဝေးမှာတော့ အကြမ်းဖျင်းသိရမယ်လို့လည်း ပြောပါတယ်။ 
 
လာမယ့် ဇွန်လ(၂၆)ရက်မှာကျရောက်မယ့်  အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမ၀င်ရောင်းဝယ်မှု တိုက်ဖျက်ရေးနေ့အထိမ်းအမှတ်အဖြစ် မူးယစ်ဆေးဝါးတွေကို မီးရှို့ဖျက်ဆီးမှုတွေအပြင် မူးယစ်ဆေးဝါးနဲ့ပတ်သက်တဲ့ ပန်းချီ၊ ကာတွန်း၊ပိုစတာ၊ ကွန်ပျူတာပန်းချီ ပြိုင်ပွဲတွေကို ရန်ကုန်တိုင်းဒေသကြီးမှာကျင်းပပြုလုပ်မှာ ဖြစ်ပါတယ်။
 
ဒီအတွက် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးအောင်စိုးမိုးက ဦးဆောင်ပြီး တိုင်းဒေသကြီးရဲတပ်ဖွဲ့အပါအ၀င် သက်ဆိုင်ရာဌာနတွေနဲ့ ဒုတိယအကြိမ်လုပ်ငန်းညှိနှိုင်းအစည်းအဝေးကို မေလ(၂၁)ရက်က ပြုလုပ်ခဲ့ပါတယ်။ရန်ကုန်မှာ မီးရှို့ဖျက်ဆီးမယ့် တပ်ဖွဲ့(၉)ခုက ဖမ်းဆီးရမိမူးယစ်ဆေးဝါးတွေကိုတော့  ဇွန်လ(၁)ရက်ကနေစတင်ပြီး   ဇွန်(၂၅)ရက်နေထိ လက်ခံပေးသွားမယ်လို့လည်း ပြောပါတယ်။
 
ဒီနှစ်မူးယစ်ဆေးဝါးမီးရှို့ဖျက်ဆီးမှုအတွက်  ကော်မတီရဲ့နောက်ထပ်လုပ်ငန်းညှိနှိုင်း အစည်းအဝေးတစ်ခု ပြုလုပ်သွားဖို့ရှိပြီး ဒီအတွက်တိုင်းဒေသကြီးရဲတပ်ဖွဲ့အပါဝင် သက်ဆိုင်ရာ ဌာနတွေစုပေါင်းကာ  ကော်မတီ၊ ဆပ်ကော်မတီတွေဖွဲ့စည်းပြီး လုပ်ဆောင်နေပါတယ်။ရန်ကုန်မှာ ပြီးခဲ့တဲ့နှစ်က မီးရှို့ဖျက်ဆီးခဲ့တဲ့ မူးယစ်ဆေးဝါးတန်ဖိုးမှာ ငွေကျပ် (၃၀၀)ဘီလီယံ နီးပါးတန်ဖိုးရှိခဲ့ပြီး မီးရှို့ဖျက်ဆီးခဲ့တဲ့ သက်တမ်းတစ်လျှောက် အများဆုံးဖြစ်တယ်လို့ သိရပါတယ်။ 
 
 

Related News