မြန်မာနိုင်ငံရဲ့ပြုပြင်ပြောင်းလဲမှုလုပ်ငန်းစဉ်တွေထဲက ဦးစားပေးကဏ္ဍဖြစ်တဲ့ တရားဥပဒေ စိုးမိုးမှုတိုးတက်လာရေးကို အထောက်အကူဖြစ်စေဖို့အတွက် မြန်မာဥပဒေ သတင်းအချက်အလက် စနစ်ကို ပြည်ထောင်စုရှေ့နေချုပ်ရုံးက စတင်ထုတ်လွှင့်လိုက်တယ်လို့ သိရပါတယ်။ မြန်မာဥပဒေသတင်းအချက်အလက်စနစ်ကို ပြည်ထောင်စုရှေ့နေချုပ်ရုံးရဲ့Website မှ တစ်ဆင့်စတင် ထုတ်လွှင့်ခဲ့တာပါ။ မြန်မာဥပဒေသတင်းအချက်အလက်စနစ်မှာ ၁၉၅၅ ခုနှစ်ကနေ ယနေ့အထိပြဋ္ဌာန်း ထုတ်ပြန်ထားတဲ့ ဥပဒေတွေ၊ နည်းဥပဒေတွေ၊ စည်ကမ်းတွေအပါအ၀င် အမိန့်တွေနဲ့ ညွှန်ကြားချက်တွေကို အတတ်နိုင်ဆုံးပြည့်စုံအောင် ရှာဖွေစုဆောင်းတင်ပြထားတာလို့ ပြည်ထောင်စုရှေ့နေချုပ် ဦးထွန်းထွန်းဦးက ပြောပါတယ်။

ပြည်သူတွေအနေနဲ့ ဥပဒေပြဋ္ဌာန်းချက်တွေ၊ ထုတ်ပြန်ချက်တွေကို အချိန်နဲ့တပြေးညီ သိရှိနိုင်စေဖို့ အတွက် မြန်မာဥပဒေသတင်းအချက်အလက်စနစ်ကိုထူထောင်ခဲ့တာလို့ သိရပါတယ်။ အဲဒီ မြန်မာဥပဒေ သတင်းအချက်အလက်စနစ်ထဲမှာ တိုင်းဒေသကြီးနဲ့ ပြည်နယ်လွှတ်တော် အသီးသီးက ပြဋ္ဌာန်းထားတဲ့ ဥပဒေတွေနည်းဥပဒေတွေကိုလဲ တင်ပြထားတယ်လို့ သိရပါတယ်။ ဒါ့အပြင် လက်ရှိတည်ဆဲဥပဒေတွေသာမက ပြည်သူတွေအနေနဲ့ ဥပဒေသမိုင်းကြောင်းကို သိရှိစေဖို့အတွက် ရုတ်သိမ်းပြီးတဲ့ ဥပဒေတွေကို ဖော်ပြထားတယ်လို့ သိရပါတယ်။

မြန်မာဥပဒေသတင်းအချက်အလက်စနစ်ထဲမှာ ဥပဒေတွေကို တစ်ခုချင်းစီအလိုက် မူလပြဋ္ဌာန်းချက် တွေ၊ ပြင်ဆင်ချက်တွေ၊ ပြင်ဆင်ခဲ့တဲ့ အကြိမ်အရေအတွက်တွေအပါအ၀င်ပြင်ဆင်တဲ့ ခုနှစ်နဲ့ အကြောင်းအရာတွေကိုလည်းအလွယ်တကူ ရှာဖွေကြည့်ရှုနိုင်ဖို့ ဆောင်ရွက်ထားတယ်လို့ သိရပါတယ်။ မြန်မာဥပဒေသတင်းအချက်အလက်စနစ် စတင်ထုတ်လွှင့်ခြင်းအခမ်းအနားကို မေလ ၂၄ ရက်က နေပြည်တော်မှာရှိတဲ့ ဟိလ်တန်ဟိုတယ်မှာ ပြုလုပ်ခဲ့တာဖြစ်ပြီး ပြည်ထောင်စုဝန်ကြီးတွေ၊ ယခုစနစ်ကို တည်ထောင်နိုင်ရေးအကူအညီပေးခဲ့တဲ့ ကိုရီးယားနိုင်ငံက တာဝန်ရှိသူတွေ တက်ရောက်ခဲ့ကြတယ်လို့ သိရပါတယ်။

 

 

Related News