တတိယအကြိမ် ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံ ကျင်းပမယ့်ရက်ကို လာမယ့် ဇူလိုင်လ(၁၀)ရက်ဝန်းကျင်မှာသတ်မှတ်နိုင်မယ်လို့ ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ(UPDJC) အတွင်းရေးမှူးအဖွဲ့ဝင် ဦးလှမောင်ရွှေက ပြောပါတယ်။ တတိယအကြိမ် ပြည်ထောင်စုငြိမ်းချမ်းရေးညီလာခံ၂၁ရာစုပင်လုံ ပြုလုပ်မယ့်ရက်ကို လာမယ့် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ-(UPDJC) အစည်းအဝေးတွေမှာ အတည်ပြုဆုံးဖြတ်သွားမယ်လို့ ဆိုပါတယ်။ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ(UPDJC) ရဲ့ အတွင်းရေးမှူးအဖွဲ့ အစည်းအဝေးကို ဇွန်လ(၂၅)ရက်မှာ လည်းကောင်း၊ လုပ်ငန်းကော်မတီအစည်းအဝေးကိုတော့ ဇွန်လ(၂၆)ရက်ကနေ(၂၈)ရက်အထိပြုလုပ်ပြီးတာနဲ့ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ(UPDJC) အစည်းအဝေးပြုလုပ်သွားမယ်လို့ ဦးလှမောင်ရွှေက ပြောပါတယ်။

တတိယအကြိမ် ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို ပြီးခဲ့တဲ့ ဒီဇင်ဘာလအတွင်း ပြုလုပ်ဖို့ သတ်မှတ်ထားပေမဲ့ အကြောင်းအမျိုးမျိုးကြောင့် ယခုအချိန်ထိ ပြုလုပ်နိုင်ခြင်းမရှိခဲ့ပဲ လာမယ့် ဇူလိုင်လအတွင်းမှာတော့ မဖြစ်မနေကျင်းပသွားမယ်လို့သိရပါတယ်။ ပြည်ထောင်စုငြိမ်းချမ်းရေး ညီလာခံ ၂၁ရာစုပင်လုံကျင်းပနိုင်ရေးနဲ့ ပတ်သက်ပြီး အစိုးရ၊လွှတ်တော်နဲ့ တပ်မတော်အစုအဖွဲ့တွေပါဝင်တဲ့ အကြိုညှိနှိုင်းဆွေးနွေးပွဲ တစ်ရပ်ကို နေပြည်တော်မှာ ရှိတဲ့ အမျိုးသား ပြန်လည်သင့် မြတ်ရေးနှင့် ငြိမ်းချမ်းရေးဗဟိုဌာန (NRPC)မှာ ဇွန်လ၁၉ရက်က စတင်ပြီး ဇွန်လ၂၁ရက် အထိ ပြုလုပ်ခဲ့ကြပါတယ်။

ယခုပြုလုပ်ခဲ့တဲ့ဆွေးနွေးပွဲမှာ လာမယ့် ပြည်ထောင်စုငြိမ်းချမ်းရေးညီလာခံ၂၁ရာစုပင်လုံမှာ ဆွေးနွေးမဲ့ကဏ္ဍကြီး၅ခုကို ဆွေးနွေးခဲ့ကြတယ်လို့ သိရပါတယ်။ ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို တစ်နှစ်မှာ နှစ်ကြိမ်ပြုလုပ်ဖို့ ရည်မှန်းထားပေမဲ့ လက်ရှိအချိန်ထိ နှစ်ကြိမ်သာပြုလုပ်ထားပြီး ပထမအကြိမ် ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို ၂၀၁၆ သြဂုတ်လမှာလည်းကောင်း၊ ဒုတိယအကြိမ်ပြည်ထောင်စုငြိမ်းချမ်းရေးညီလာခံကို ၂၀၁၇ မေလမှာ လည်းကောင်း ပြုလုပ်ခဲ့တယ်လို့သိရပါတယ်။

 

 

Related News