တတိယအကြိမ်အဖြစ်ပြုလုပ်မယ့် ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံကို လာမည့်ဇူလိုင်လ (၁၁)ရက်မှာ စတင်ကျင်းပဖို့သဘောတူခဲ့တယ်လို့သိရပါတယ်။မနေ့ကဇွန်လ(၂၅)ရက်  ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ-(UPDJC) အတွင်းရေးမှူးအဖွဲ့ အစည်းအဝေးမှာ တတိယအကြိမ် ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံကိုလာမယ့်ဇူလိုင်လ(၁၁)ရက်မှာ စတင်ကျင်းပဖို့သဘောတူညီခဲ့တာပါ။ သဘောတူညီခဲ့တဲ့ ရက်ကိုဇွန်လ(၂၉)ရက်မှာပြုလုပ်မယ့်UPDJC အစည်းအဝေးမှာ တင်ပြပြီးအတည်ပြုချက်ရယူကာ ညီလာခံကိစ္စတွေကို ဆက်လက်ဆောင်ရွက်သွားမယ်လို့ UPDJC အတွင်းရေးမှူးအဖွဲ့ဝင် ဦးဇော်ဌေးကပြောပါတယ်။

လာမယ့်ဇူလိုင်လ(၁၁)ရက်မှာစတင်ကျင်းပမယ့်တတိယအကြိမ် ပြည်ထောင်စုငြိမ်းချမ်းရေး ညီလာခံ (၂၁)ရာစုပင်လုံကို ယခင်ညီလာခံတွေနဲ့မတူညီတဲ့အခင်းအကျင်းအချို့ကိုပြောင်းလဲထားတယ်လို့ သိရပါတယ်။ ပြောင်းလဲထားတဲ့ညီလာခံအခင်းအကျင်းအချို့ထဲမှာ ဒုတိယအကြိမ် အစည်းအဝေးတုန်းက ကဏ္ဍအလိုက် အစည်းအဝေး တွေကို အလေးထားဆောင်ရွက်ခဲ့ပေမယ့်ယခုအစည်းအဝေးမှာတော့ အစုအဖွဲ့အလိုက်အစည်း အဝေးတွေကို အဓိကဦးစားပေးလုပ်ဆောင်သွားမယ်လို့ ဦးဇော်ဌေးကပြောပါတယ်။

ယခုပြုလုပ်ခဲ့တဲ့ (၂၁)ကြိမ်မြောက် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ-(UPDJC) အတွင်းရေးမှူးအဖွဲ့ အစည်းအဝေးမှာ ညီလာခံကျင်းပနိုင်ဖို့ဆွေးနွေးခဲ့ကြတဲ့အပြင် ဆုံးဖြတ်ချက်(၁၅)ချက်ကို ချမှတ်နိုင်ခဲ့တယ်လို့သိရပါတယ်။ အဲဒီဆုံးဖြတ်ချက်တွေထဲမှာ ဇွန်လ(၂၆)ရက်ကနေဇွန်လ(၂၈)ရက်အထိ ပြုလုပ်မယ့် UPDJCလုပ်ငန်းကော်မတီအစည်းအဝေးနဲ့ ပတ်သက်တဲ့ အစီအစဉ်တွေလည်းပါဝင်တယ်လို့သိရပါတယ်။

ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံကို တစ်နှစ်လျှင်နှစ်ကြိမ်ခန့်ပြုလုပ်ဖို့ ရည်မှန်းထားပေမယ့် လက်ရှိအချိန်ထိ ၂၀၁၆ သြဂုတ်လမှာတစ်ကြိမ်နဲ့ ၂၀၁၇မေလမှာ တစ်ကြိမ် ပြုလုပ်ထားပါတယ်။

 

 

Related News