ရန်ကုန်မြို့တော်စည်ပင်သာယာရေးဥပဒေကြမ်းကို တိုင်းဒေသကြီးလွှတ်တော်မှာ အဆုံးအဖြတ်ရယူအတည်ပြုပြီးနောက် တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေးပြီးဆုံးပြီဖြစ်တယ်လို့ ဇွန်လ(၂၇)ရက်က ရန်ကုန်တိုင်းဒေသကြီး လွှတ်တော်ဥက္ကဌ ဦးတင်မောင်ထွန်းက ပြောကြားခဲ့ပါတယ်။

ဒီအစည်းအဝေးမှာ ဒဂုံမြို့သစ်(တောင်ပိုင်း)မြို့နယ်ဆေးရုံမှာ ၀င်ပေါက်အသစ်၊လူနာနားနေဆောင်၊ လျှပ်စစ်မီး စတာတွေကို လုပ်ဆောင်ပေးဖို့ ရှိမရှိကို တိုင်းဒေသကြီးလွှတ်တော်ကိုယ်စားလှယ် ဦးညီညီမေးမြန်းခဲ့ပြီး တိုင်းဒေသကြီးအစိုးရအဖွဲ့က လုပ်ဆောင်ပေးဖို့ရှိကြောင်း ပြန်လည်ဖြေကြားမှုတွေလည်းပါဝင်ခဲ့ပါတယ်။

အဲဒီနောက်မှာတော့   ရန်ကုန်မြို့တော်စည်ပင်သာယာရေးဥပဒေကြမ်းရဲ့ ဆွေးနွေးဖို့ကျန်ရှိနေတဲ့ အခန်း၊ စာပိုဒ်တွေကို ဆက်လက်ဆွေးနွေးခဲ့တာပါ။ အခန်း(၅)ကနေ(၃၂)ထိ စုစုပေါင်း အခန်း(၂၈)ခန်းလုံးကို အပြီးသတ်ဆွေးနွေးခဲ့တာပါ။ ဒီဆွေးနွေးမှုတွေမှာ လွှတ်တော်ဆိုင်ရာကော်မတီတွေနဲ့ ကိုယ်စားလှယ်တွေရဲ့ အဆိုပြု၊အကြံပြုချက်စတာတွေကို ဥပဒေကြမ်းကော်မတီက ဖြည့်စွက်အဆိုပြုတင်ပြခဲ့တာတွေရှိသလို ဖြုတ်ချသင့်တဲ့ အခန်းတွေနဲ့စာပိုဒ်တွေကိုလည်းတင်ပြခဲ့တာတွေရှိခဲ့ပါတယ်။ ဒီလိုအဆိုပြုဖြည့်စွက်တာ၊ ပယ်ဖျက်တာတွေကို တိုင်းဒေသကြီးအစိုးရအဖွဲ့ထံ သဘောထားမှတ်ချက်ရယူပြီး အခန်းအလိုက်၊ စာပိုဒ်အလိုက်အသီးသီး လွှတ်တော်အဆုံးအဖြတ်ရယူကာ အတည်ပြုခဲ့ကြတာပါ။ အားလုံးအပြီးမှာတော့ ဥပဒေကြမ်းတစ်ခုလုံးကို လွှတ်တော်အဆုံးအဖြတ်ရယူပြီး အတည်ပြုပေးခဲ့ပါတယ်။

ဒီဥပဒေကြမ်းမှာ စည်ပင်သာယာရေးကော်မတီကို အဖွဲ့ဝင်(၁၁)ဦးနဲ့ ဖွဲ့စည်းကာ  ဒုတိယမြို့တော်ဝန်ခန့်အပ်ဖို့ ပါဝင်ပါတယ်။ ဥပဒေကြမ်းကိုတော့ အပိုဒ်၊အပိုဒ်ခွဲ၊အပိုဒ်ခွဲငယ်စတာတွေနဲ့ ဖွဲ့စည်းထားကာအခန်း(၃၂)ခန်းရှိပြီး ဇွန်လ(၂၅)ရက်နဲ့(၂၇)ရက် (၂)ရက်အတွင်း အစည်းအဝေးမှာ အပြီးဆွေးနွေး အတည်ပြုခဲ့တာဖြစ်ပါတယ်။ ဥပဒေကြမ်းအပါအ၀င် ခုလိုဆွေးနွေး အတည်ပြုပေးတာနဲ့ပတ်သက်ပြီးတော့ လွှတ်တော်ကိုယ်စားလှယ်တစ်ချို့က အခုလိုပြောပါတယ်။

လွှတ်တော်က အတည်ပြုပေးခဲ့တဲ့ ရန်ကုန်မြို့တော်စည်ပင်သာယာရေးဥပဒေကြမ်းကိုတော့ ဒီကနေ့ ဇွန်လ(၂၈)ရက်မှာ ရန်ကုန်မြို့တော်ခန်းမမှာ ရန်ကုန်တိုင်းဒေသကြီးဝန်ကြီးချုပ်က လက်မှတ်ရေးထိုးပြဌာန်းသွားမယ်လို့ သိရပါတယ်။ ဆဋ္ဌမပုံမှန်အစည်းအဝေးကို ရက်ပေါင်း(၅၁)ရက် ကျင်းပခဲ့တာဖြစ်ပြီး ဒီကာလအတွင်း ရန်ကုန်မြို့တော်စည်ပင်သာယာရေးဥပဒေကြမ်း အပါအ၀င် ဥပဒေကြမ်းတွေ၊အဆိုတွေ၊ စီမံကိန်းတွေ၊အစီရင်ခံစာတွေနဲ့  မေးခွန်းပေါင်းရာချီကို မေးမြန်းတင်သွင်း၊ ဖြေကြားအတည်ပြုတာတွေ လုပ်ဆောင်ခဲ့ပါတယ်။ 

 

 

Related News