ရန်ကုန်မြို့တော်စည်ပင်သာယာရေးဥပဒေကြမ်း(၂၀၁၈)ကို တိုင်းဒေသကြီးလွှတ်တော်က အတည်ပြုပေးခဲ့ပြီး ဇွန်လ(၂၈)ရက်က ရန်ကုန်မြို့တော်ခန်းမမှာ  ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက အတည်ပြု လက်မှတ်ရေးထိုးပြဋ္ဌာန်းခဲ့ပါတယ်။ရန်ကုန်မြို့တော်စည်ပင်သာယာရေးဥပဒေ(၂၀၁၈)ကိုပြဋ္ဌာန်းဖို့ အတည်ပြုလက်မှတ်ရေးထိုးတာနှင့် လွှဲပြောင်းပေးအပ်ပွဲအခမ်းအနားကို ရန်ကုန်မြို့တော်ခန်းမမှာ လုပ်ဆောင်ခဲ့ပါတယ်။

အခမ်းအနားမှာ  ရန်ကုန်မြို့တော်ဝန်ဦးမောင်မောင်စိုးက ဥပဒေနဲ့ ပတ်သက်ပြီး မြူနီစီပယ်အက်ဥပဒေတွေကနေ လက်ရှိအချိန်ထိ အမည်အမျိုးမျိုးနဲ့ ခေတ်အဆက်ဆက်ကျင့်သုံးလာခဲ့တဲ့ စည်ပင်သာယာဥပဒေတွေအကြောင်းကို  ကနဦးရှင်းလင်းတင်ပြခဲ့ပါတယ်။ ဒီဥပဒေကို ရန်ကုန်မြို့တော်စည်ပင်သာယာရေးဥပဒေ(၂၀၁၈)အဖြစ် ခေါ်တွင်ရမှာဖြစ်ပြီး မြို့တော်စည်ပင်သာယာလုပ်ငန်းတွေ ဒီမိုကရေစီစံနှုန်းနဲ့ကိုက်ညီစေဖို့ မြို့တော်သူ၊ မြို့တော်သားတွေရဲ့ လိုအပ်ချက်တွေ အပြည့်အ၀ရရှိစေဖို့၊ စီးပွားရေးမြို့တော်ကြီးတစ်ခုဖြစ်စေမယ့် ဥပဒေတစ်ရပ် အတည်ပြုပြဋ္ဌာန်းနိုင်အောင် လုပ်ဆောင်ခဲ့တာဖြစ်တယ်လို့ ရန်ကုန်မြို့တော်ဝန်ကရှင်းလင်းပြောကြားပါတယ်။

အဲဒီနောက် ရန်ကုန်တိုင်းဒေသကြီးဝန်ကြီးချုပ်ဦးဖြိုးမင်းသိန်းက ရန်ကုန်မြို့တော်စည်ပင်သာယာရေးဥပဒေ(၂၀၁၈)ကို လက်မှတ်ရေးထိုး အတည်ပြုပြဋ္ဌာန်းပေးခဲ့ပြီး မြို့တော်ဝန်ကို လွှဲပြောင်းပေးအပ်ခဲ့တာပါ။ ဒီဥပဒေနဲ့ပတ်သက်လို့ အနာဂတ်ရန်ကုန်မြို့တော်အတွက် အရေးကြီးဆုံးဥပဒေဖြစ်သလို မြို့တော်ကို မောင်းနှင်သွားမယ့်ဥပဒေဖြစ်လို့ ဌာနဆိုင်ရာတွေအပါအ၀င် အများပြည်သူတွေလိုက်နာဆောင်ရွက်ရမှာဖြစ်တယ်လို့ ၀န်ကြီးချုပ်ဦးဖြိုးမင်းသိန်းက အမှာစကားမှာ ထည့်သွင်းပြောကြားခဲ့ပါတယ်။ နိုင်ငံတကာရင်းနှီးမြှုပ်နှံသူတွေကလည်း ရန်ကုန်မြို့တော်စည်ပင်သာယာဥပဒေကို စိတ်ဝင်စားကြလို့ မကြာခင်မှာ ဥပဒေကို အင်္ဂလိပ်ဘာသာနဲ့ ထုတ်ပြန်ပေးသွားမယ်လို့ ပြောပါတယ်။

ရန်ကုန်မြို့တော်စည်ပင်သာယာကို တာဝန်ခံအဖွဲ့(၇)ဖွဲ့နဲ့ ဌာနကြီး(၃)ခုက ထိန်းညှိသွားမှာ ဖြစ်တယ်လို့ ပြောပါတယ်။ ဒီဥပဒေမှာ ပုဒ်မပေါင်း(၃၃၇)ခု၊ အခန်း(၃၂)ခန်းနဲ့ဖွဲ့စည်းကာ ပြစ်မှုပြစ်ဒဏ်အနေနဲ့(၁၆၈)ခုရှိပါတယ်။ ၂၀၁၃ခုနှစ် ရန်ကုန်မြို့တော်စည်ပင်သာယာရေးဥပဒေကိုပြင်ဆင်ဖို့ ၂၀၁၇ခုနှစ် မတ်လကတည်းက တိုင်းဒေသကြီးအစိုးရအဖွဲ့က အစည်းအဝေးဆုံးဖြတ်ချက်ချမှတ်ပေးခဲ့ပြီး မြို့တော်စည်ပင်သာယာအပါအ၀င် သက်ဆိုင်ရာပညာရှင်တွေနဲ့ ဥပဒေကြမ်းရေးဆွဲရေး ကော်မတီတွေ ဖွဲ့စည်းလုပ်ဆောင်ခဲ့တာပါ။

ရေးဆွဲပြီးတဲ့ ဥပဒေကြမ်းကို လွှတ်တော်သို့တင်သွင်းခဲ့ပြီး အဆင့်ဆင့်ဆွေးနွေးအတည်ပြုတာတွေပြုလုပ်ကာ ၂၀၁၈ခုနှစ်ဇွန်လ(၂၇)ရက်မှာ ရန်ကုန်တိုင်းဒေသကြီးလွှတ်တော်က အတည်ပြုပေးခဲ့တာလည်းဖြစ်ပါတယ်။ အခမ်းအနားကို တိုင်းဒေသကြီးအစိုးရအဖွဲ့ဝင်တွေ၊ ဌာနဆိုင်ရာ အကြီးအကဲတွေ၊ ပညာရှင်တွေ၊ သက်ဆိုင်ရာအဖွဲ့အစည်းက တာဝန်ရှိသူတွေတက်ရောက်ခဲ့ကြပါတယ်။ 

 

 

 

 

Related News