တတိယအကြိမ်ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို လာမည့် ဇူလိုင်လ၁၁ရက်မှ စတင်ကျင်းပဖို့ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ-(UPDJC) အစည်းအဝေးကနေ အတည်ပြုဆုံးဖြတ်လိုက်တယ်လို့ သိရပါတယ်။ တတိယအကြိမ် ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို လာမည့်ဇူလိုင်လ(၁၁)ရက်ကနေ(၁၆)ရက်အထ(၆)ရက်ကြာပြုလုပ်ဖို့ဆုံးဖြတ်ခဲ့တယ်လို့ သိရပါတယ်။ ပြည်ထောင်စုငြိမ်းချမ်းရေးညီလာခံ၂၁ ရာစုပင်လုံကို တက်ရောက်ဖို့ရာအတွက် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) မှာ လတ်မှတ်မရေးထိုးရသေးတဲ့ အဖွဲ့တွေကို ဖိတ်ကြားရန်ဆုံးဖြတ်ခဲ့ပြီး တစ်ဖွဲ့ချင်းစီကိုနည်းလမ်းပေါင်းစုံနဲ့ ဖိတ်ကြားသွားမယ်လို့ ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ(UPDJC)ဒုတိယဥက္ကဋ္ဌ ဒေါက်တာဆလိုင်းလျန်မှုန်းဆာခေါင်းက ပြောပါတယ်။ 

တတိယအကြိမ်အဖြစ်ပြုလုပ်မယ့် ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို လာမည့်ဇူလိုင်လ ၁၁ရက်မှ စတင်ကျင်းပဖို့ ဆုံးဖြတ်ခဲ့တဲ့ ၁၅ကြိမ်မြောက် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ-(UPDJC) အစည်းအဝေးကို ဇွန်လ(၂၉)ရက်က အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC)မှာပြုလုပ်ခဲ့တာပါ။

အဆိုပါအစည်းအဝေးမှာ ပြည်ထောင်စုငြိမ်းချမ်းရေးညီလာခံ- ၂၁ ရာစုပင်လုံ တတိယအစည်း အဝေး ကျင်းပမည့် ရက်သတ်မှတ်ခြင်းအပါအ၀င် UPDJC သို့တင်သွင်းသည့် စာတမ်းများအတည်ပြုခြင်းကိစ္စတွေ ၊ နိုင်ငံရေး၊ စီးပွားရေး၊ လူမှုရေး၊ လုံခြုံရေး၊ မြေယာနှင့် သဘာဝပတ်ဝန်းကျင်ကဏ္ဍ လုပ်ငန်းကော်မတီများ၏ ဆောင်ရွက်ချက်များတင်ပြခြင်းတွေ ၊ ကဏ္ဍအလိုက်လုပ်ငန်းကော်မတီတွင် ဆွေးနွေးမည့်ခေါင်းစဉ်များအတည်ပြုခြင်းတွေ၊ လုပ်ငန်းကော်မတီ အကျိုးဆောင်များ လုပ်ငန်းလမ်းညွှန်(TOR) ကို အတည်ပြုခြင်း တို့ကို ဆောင်ရွက်နိုင်ခဲ့တယ်လို့ သိရပါတယ်။ ဒါ့အပြင် ညီလာခံဆိုင်ရာ ကိစ္စရပ်များဖြစ်တဲ့ ပြည်ထောင်စုငြိမ်းချမ်းရေး ညီလာခံ၂၁ရာစုပင်လုံအတွက် ညီလာခံအစီအစဉ်အတည်ပြုခြင်းတွေအပါအ၀င် ညီလာခံကိုအောင်မြင်စွာကျင်းပနိုင်ရေးအတွက် ဆွေးနွေးခဲ့ကြတယ်လို့သိရပါတယ်။ ပြည်ထောင်စုငြိမ်းချမ်းရေးညီလာခံ၂၁ရာစုပင်လုံကို တစ်နှစ်လျှင်နှစ်ကြိမ်ခန့်ပြုလုပ်ဖို့ ရည်မှန်းထားပေမဲ့ လက်ရှိအချိန်ထိ ၂၀၁၆ သြဂုတ်လမှာတစ်ကြိမ်နဲ့ ၂၀၁၇မေလမှာ တစ်ကြိမ် ပြုလုပ်ထားပါတယ်။

 

 

Related News