ငြိမ်းချမ်းရေးလုပ်ငန်းစဉ်ရဲ့ တစ်ဆို့နေတဲ့အခြေအနေတစ်ချို့ကို အဖြေရှာဖို့ အစိုးရ၊ လွှတ်တော်၊ တပ်မတော်နဲ့NCA လက်မှတ်ရေးထိုးပြီး အဖွဲ့တွေရဲ့ ခေါင်းဆောင်ပိုင်းတွေ အမြန်ဆုံးတွေ့ဆုံနိုင်ရေးလုပ်ဆောင်နေတယ်လို့ ပအိုဝ်းအမျိုးသားလွတ်မြောက်ရေးအဖွဲ့(PNLO)နာယကခွန်ဥက္ကာကပြောပါတယ်။ ဒါဟာပြီးခဲ့တဲ့ (၂၁)ရာစု ပင်လုံတတိယအစည်းအဝေး အတွင်း နိုင်ငံတော်၏အတိုင်ပင်ခံပုဂ္ဂိုလ်နဲ့အပစ်ရပ်အဖွဲ့တွေ တွေ့ဆုံမှုမှာ မူအားဖြင့်သဘောတူထားခဲ့တာဖြစ်တယ်လို့ သိရပါတယ်။ဒီတွေ့ဆုံမှုဟာ အလွတ်သဘောတွေ့ဆုံမှုမျိုးဖြစ်ပေမယ့် အရင်ကလို အလယ်အလတ်အဆင့်တွေ တွေ့ဆုံပြီး အဖြေမထွက်တာမျိုး မဖြစ်စေဖို့ရည်ရွယ်ထားတယ်လို့ခွန်ဥက္ကာက ပြောပါတယ်။

ဒါဟာခေါင်းဆောင်(၁၀)ဦးချင်း တွေ့ဆုံမယ့် (10+10) တွေ့ဆုံပွဲဖြစ်ပြီး NCA ထိုးပြီးအဖွဲ့တွေဘက်ကတော့ ခေါင်းဆောင်(၁၀)ယောက်လုံး တက်ရောက် မှာဖြစ်ကာ အစိုးရဘက်က(၄)ဦး၊လွှတ်တော်က(၃)ဦး နဲ့ တပ်မတော်ဘက်က(၃)ဦးတက်ရောက်နိုင်ဖို့ မျှော်လင့်ထားတယ်လို့သိရပါ တယ်။ဒီတွေ့ဆုံမှုဖြစ်လာစေဖို့အတွက် KNU က ပဒိုစောကွယ်ထူးဝင်းဦးဆောင်တဲ့အဖွဲ့ဝင်ခုနှစ်ဦးပါ ညှိနှိုင်းရေးအဖွဲ့က ဆောင်ရွက်နေပြီး လက်ရှိမှာ ရက်အတိအကျထွက်မလာသေးဘူးလို့သိရပါ တယ်။ဒီတွေ့ဆုံမှုမှာ ခေါင်းဆောင်ပိုင်းအချင်းချင်းသဘောတူညီမှုတွေက ပင်လုံအစည်းအဝေးအတွင်းဆွေးနွေးမှုတွေကို အထောက်အကူဖြစ်စေမှာဖြစ်တာကြောင့် လာမယ့် ပင်လုံအစည်းအဝေး မတိုင်ခင်ဖြစ်မြောက်နိုင်ဖို့ အပစ်ရပ်အဖွဲ့တွေဘက်က လိုလားနေကြပါတယ်။

နောက်တစ်ကြိမ်ပင်လုံအစည်းအဝေးကိုတော့လာမယ့် နိုဝင်ဘာ မှာကျင်းပနိုင်ဖို့ အပစ်ရပ်အဖွဲ့တွေဘက်က လျာထားတာဖြစ်ပါတယ်။ငြိမ်းချမ်းရေးဖြစ်စဉ်အတွင်း မပြေလည်တဲ့အကြောင်းအရာ၊ကိစ္စရပ်တွေအတွက် လက်ရှိမှာနှစ်ဖက်ခေါင်းဆောင်ပိုင်းတွေ တက်ရောက်ကြတဲ့JICM အစည်းအဝေးမှာ အဖြေရှာကြတာဖြစ်ပါတယ်။ငြိမ်းချမ်းရေးလုပ်ငန်းစဉ် လမ်းပြမြေပုံအရ (၂၁)ရာစုပင်လုံအစည်းအဝေးကို လက်ရှိအချိန်ထိ သုံးကြိမ်ပြုလုပ်ထားပြီးဖြစ်ပြီး နိုင်ငံရေးကဏ္ဍက(၁၆)ချက်၊ စီးပွားရေး ကဏ္ဍက (၁၁)ချက်၊လူမှုရေးကဏ္ဍ က (၁၂)ချက် နဲ့မြေယာနဲ့သဘာဝပတ်ဝန်းကျင်ကဏ္ဍက(၁၁)ချက် စုစုပေါင်း သဘော တူညီချက် (၅၁)ချက်ရရှိထားပြီးဖြစ်ပါတယ်။ဒါကို ပြည်ထောင်စု သဘောတူ စာချုပ်၏အစိတ်အပိုင်းအဖြစ် ပြည်ထောင်စု လွှတ်တော်က အတည်ပြုထားပြီးဖြစ်ပါတယ်။

 

 

Related News