အောင်ဘာလေသိန်းဆုထီလက်မှတ်တွေကို အစိုးရသတ်မှတ်ရောင်းဈေးကျပ်(၅၀၀)ထက် ပိုမိုအမြတ်တင်ကာ လက်လီ၊ လက်ကား ရောင်းချနေတာတွေ၊ တစ်စောင်တည်းဝယ်ယူလို့မရတာတွေအပေါ် အရေးယူဖို့ရှိ မရှိကို ရန်ကုန်တိုင်းဒေသကြီးလွှတ်တော်မှာ မေးခွန်းမေးမြန်းခဲ့ပါတယ်။ ရန်ကုန်တိုင်းဒေသကြီးအတွင်း ထီဆိုင်ကြီးတွေက ထီလက်မှတ်တွေကို အစိုးရသတ်မှတ်ရောင်းဈေး (၅၀၀)ကျပ်ထက် ပိုမိုအမြတ်တင်ကာ လက်လီ၊ လက်ကား ရောင်းချနေတာတွေဟာ အောင်ဘာလေသိန်းဆုဌာနက ချမှတ်ထားတဲ့ စည်းမျဉ်းစည်းကမ်းများနှင့် ညီညွတ်မှု ရှိ/မရှိနဲ့အရေးယူ ဆောင်ရွက်သွားဖို့ အစီအစဉ်ရှိ/မရှိ”ကို စက်တင်ဘာ(၁၉)ရက်က တိုင်းဒေသကြီးလွှတ်တော်မှာ မရမ်းကုန်းမြို့နယ်အမတ် ဦးရန်ရှင်းက မေးမြန်းခဲ့ပါတယ်။

တစ်စောင်တည်းဝယ်ယူလို့ မရတာကြောင့် အများပြည်သူတွေအလွယ်တကူကံစမ်းလို့မရတာ၊ ထီတစ်စောင်ဈေး ကျပ်(၇၀၀)ဝန်းကျင်အထိဖြစ်နေ တာတွေအပြင် ထီဆိုင်တွေအနေနဲ့ နိုင်ငံတော်နဲ့ပြည်သူ့ငွေကြေးတွေ ကျပ်သန်းပေါင်းများစွာ ကြားခံအမြတ်ရရှိသွားတာတွေ ဖြစ်နေလို့ ခုလိုမေးမြန်းခဲ့တာလို့ ပြောပါတယ်။ အောင်ဘာလေသိန်းဆုဌာန ၊ မြို့နယ် ဌာနခွဲတွေနဲ့ မိုးယံရွှေလမင်းနှင့် မြတ်ဆုကုဋေရဲ့ ရန်ကုန်ဆိုင်ခွဲ(၁၇)ဆိုင်နဲ့မန္တလေးဆိုင်ခွဲ(၆၃)ဆိုင်က တစ်စောင်ကို ကျပ်(၅၀၀)နဲ့ ရောင်းချပေးနေပြီး တစ်စောင်ချင်းလည်း ရောင်းချပေးနေတယ်လို့ သိရကြောင်း စီမံကိန်းနှင့် ဘဏ္ဍာရေးဝန်ကြီးဦးမြင့်သောင်းက ပြောကြားခဲ့ပါတယ်။ ထီကံစမ်းသူတွေရဲ့ အစွဲအလန်းအရ မည်သည့်အက္ခရာ၊ မည်သည့်ဂဏန်း စသည်ဖြင့် အစွဲအလန်းထား ကံစမ်းလာကြလို့ ထီဆိုင်ကြီးတွေဟာ ဈေးကွက်သဘာဝအရ စိတ်ဝင်စားမှုရှိအောင် ဝယ်လိုအားမြှင့်တက်လာအောင် အက္ခရာ၊ ဂဏန်းများကို စုစည်းပြင်ဆင်ပြီး ဖြန့် ဖြူးရောင်းချလာတာကို တွေ့ရှိနေပြီး ဒီလိုဆောင်ရွက်မှုများကြောင့် ထုတ်ပိုးမှုကုန်ကျစရိတ်တွေ မြှင့်တက်လာပြီး ထီဈေးနှုန်းပြဿနာ ဖြစ်ပေါ်လာတာဖြစ်တယ်လို့လည်း ပြောပါတယ်။

ဒီအတွက် အောင်ဘာလေသိန်းဆုဌာနဲ့ ဆက်သွယ်ပြီးတော့ ဘယ်လိုစီစဉ်ဆောင်ပေးမလဲဆိုတာကို  ပြန်လည် ဖြေကြားပေးသွားမယ်လို့လည်း ပြောကြားခဲ့ပါတယ်။ အောင်ဘာလေသိန်းဆုဌာနခွဲအနေနဲ့ အောင်ဘာလေထီဥပဒေကို ပြဋ္ဌာန်းနိုင်ခြင်းမရှိသေးတာကြောင့် အဆင့်ဆင့်သော ထီဆိုင်များကို ကြီးကြပ်ထိန်းကျောင်းဖို့ အခက်အခဲများရှိနေပါတယ်။ ထီလုပ်ငန်းရှင်များအသင်းဟာ လစဉ်အစည်းအဝေး ခေါ်ပြီး ဌာနခွဲကနေ ဝယ်ယူရောင်းချသူများအနေနဲ့ ထီလက်မှတ်များကို သတ်မှတ်ထားတဲ့ဈေးနှုန်းအတိုင်း ရောင်းချဖို့ ၊ မိမိထီဆိုင်အနေနဲ့ ထပ်ဆင့်ရောင်းချတဲ့ ဆိုင်တွေကို ဈေးနှုန်းမြင့်မားမှုမရှိစေဖို့ ကြီးကြပ်တာနဲ့ လူစည်ကားရာနေရာများမှာ ရောင်းချပေးဖို့မှာကြားချက်နဲ့ ဆောင်ရွက် နေတယ်လို့လည်း ဆိုပါတယ်။

တိုင်ကြားခံရတဲ့ ထီဆိုင်ခွဲဟာ ဈေးနှုန်းတင်ပြီး ရောင်းချနေကြောင်း စိစစ်တွေ့ရှိရပါက ပင်ရင်းဆိုင်တွေရဲ့ ကြီးကြပ်မှုအားနည်းသည်ဟု သတ်မှတ်ကာ ယင်းပင်ရင်းဆိုင် ရောင်းချတဲ့ ထီအရေအတွက်ကို လျော့ချတဲ့နည်းလမ်းနဲ့ အရေးယူဆောင်ရွက်နေတယ်လို့ သိရပါတယ်။ အောင်ဘာလေ သိန်းဆုလုပ်ငန်းဟာ (၁၉၃၈) ခုနှစ်က စတင်ဆောင်ရွက်ခဲ့ပေမယ့် ယခုအချိန်ထိ အောင်ဘာလေထီ ဥပဒေပြဋ္ဌာန်းနိုင်ခြင်း မရှိသေးလို့ အောင်ဘာလေသိန်း ဆုဌာနရဲ့ ညွှန်ကြားချက်နှင့် ဆောင်ရွက်နေရတာဖြစ်တယ်လို့ သိရပါတယ်။ အောင်ဘာလေဥပဒေပြဋ္ဌာန်းနိုင်ရေးအတွက် ပြင်ဆင်ဆောင်ရွက်နေပြီး ဥပဒေ ပြဋ္ဌာန်းပြီးပါက ထီဆိုင်အဆင့်ဆင့်ကို ကြီးကြပ်ထိန်းကျောင်းနိုင်မယ့်အပြင် သတ်မှတ်ဈေးနှုန်းများအတိုင်း ဝယ်ယူနိုင်မယ့်မိမိနှစ်သက်ရာ ဂဏန်းများကို ရွေးချယ်ကံစမ်းနိုင်တဲ့ e-lottery စနစ်လည်း အကောင်အထည်ဖော်ဆောင်ရွက်နိုင်မှာဖြစ်တယ်လို့လည်း ဝန်ကြီးကပြောကြားခဲ့ပါတယ်။

 

 

Related News