နိုင်ငံအတွင်းရှိ မိခင်နှင့်ကလေးတွေ အာဟာရချို့တဲ့မှုအမျိုးမျိုးကို ခံစားနေကြရပြီး ကာလတာရှည်အာဟာရချို့တဲ့တာကြောင့် ပုညှက်တာ၊ ပိန်လှီတာ၊ အဏုအာဟာရချို့တဲ့တာနဲ့ မွေးစကိုယ်အလေးချိန်မပြည့်တာတွေ ဖြစ်နေတယ်လို့ သိရပါတယ်။ ဒါ့ကြောင့် အစိုးရက မိခင်နှင့်ကလေးတွေအာဟာရဖွံ့ဖြိုးမှုမြှင့်တင်ရေးအတွက် (၅)နှစ်စီမံကိန်းချမှတ်ပြီး ကျပ်ဘီလီယံ(၉၀၀) ကျော် သုံးစွဲကာ အမျိုးသားအဆင့်လုပ်ဆောင်သွားမှာ ဖြစ်ပါတယ်။ကဏ္ဍပေါင်းစုံပါဝင်တဲ့ အမျိုးသားအဆင့်အာဟာရဖွံ့ဖြိုးမှုဆိုင်ရာ(၅)နှစ်စီမံကိန်းကို နိုင်ငံအတွင်းအာဟာရချို့တဲ့ ပြဿနာကို ထိထိမိမိကိုင်တွယ်ဖြေရှင်းနိုင်ဖို့ ၀န်ကြီးဌာနတွေနဲ့ အရပ်ဖက်အဖွဲ့အစည်းတွေ စုပေါင်းကာ အမျိုးအသားအဆင့် ဦးဆောင်ကော်မတီနဲ့ လုပ်ငန်းကော်မတီ၊ ဆပ်ကော်မတီတွေဖွဲ့စည်း လုပ်ဆောင်သွားမှာ ဖြစ်ပါတယ်။ ဒီအတွက်နိုဝင်ဘာ(၂၆)ရက်က ရန်ကုန်မြို့ နိုဗိုတယ်ဟိုတယ်မှာ မြန်မာနိုင်ငံအာဟာရဖွံ့ဖြိုးမှု မြှင့်တင်ရေးအမျိုးသားအဆင့် ဦးဆောင်ကော်မတီနဲ့ အာဟာရဖွံ့ဖြိုးရေးကဏ္ဍပေါင်းစပ်ညှိနှိုင်းရေးအဖွဲ့ရဲ့ ညှိနှိုင်းအစည်းအဝေးကို ပထမအကြိမ်ပြုလုပ်ခဲ့ပါတယ်။

ဒီစီမံကိန်းကို  မိခင်တွေ၊ ကလေးသူငယ်တွေနဲ့ အပျိုဖော်ဝင်အရွယ်မိန်းကလေးတွေ အာဟာရပြဿနာလျော့ပါးစေဖို့ ကျန်းမာရေး၊ ပညာရေး၊ စိုက်ပျိုးရေး၊ လူမှုဝန်ထမ်းစတဲ့ ကဏ္ဍတွေမှာ ဧရိယာ(၆)ခုသတ်မှတ်ပြီး လုပ်ဆောင်သွားမှာ ဖြစ်ပါတယ်။ ခုဘဏ္ဍာနှစ်ကစပြီး(၂၀၂၂- ၂၀၂၃)ဘဏ္ဍာနှစ်အထိ(၅)နှစ်တာအတွက် စုစုပေါင်း ခန့်မှန်းကုန်ကျငွေ ကျပ်ဘီလီယံ(၉၀၀)ကျော်ရှိမယ်လို့ ဆိုပါတယ်။ အသေးစိတ်လုပ်ဆောင်မယ့် စီမံချက်တွေကိုတော့ သက်ဆိုင်ရာလုပ်ငန်းကော်မတီ၊ ဆပ်ကော်မတီတွေကနေ မြေပြင်ကွင်းဆင်း လေ့လာမှုတွေနဲ့အတူ တိုင်းဒေသကြီးနဲ့ပြည်နယ် အစိုးရ၊ ဌာနဆိုင်ရာတွေနဲ့ ညှိနှိုင်းလုပ်ဆောင်သွားမယ်လို့ ပြောပါတယ်။ ဒီအစည်းအဝေးမှာပြည်ထောင်စုဝန်ကြီး(၄)ဦးအပါအ၀င် ဌာနဆိုင်ရာတာဝန်ရှိသူတွေ၊ ပြည်တွင်းပြည်ပ အရပ်ဖက်အဖွဲ့အစည်းတွေ၊ ပညာရှင်တွေ တက်ရောက်ခဲ့ကြပါတယ်။

စတင်လုပ်ဆောင်မယ့် ပထမကဏ္ဍ(၄)ခုဖြစ်တဲ့ ကျန်းမာရေးနှင့် အားကစားဝန်ကြီးဌာနအတွက် ကျပ်ဘီလီယံ(၂၈၀)ကျော်၊ ပညာရေးဝန်ကြီးဌာန အတွက် ကျပ်ဘီလီယံ(၂၀၀)ကျော်၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနအတွက် ကျပ်ဘီလီယံ(၂၀၀)နီးပါး၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနအတွက် ကျပ်ဘီလီယံ(၂၂၀)ကျော်သုံးစွဲသွားမှာ ဖြစ်တယ်လို့ သိရပါတယ်။(၂၀၁၅-၂၀၁၆)ဘဏ္ဍာနှစ်မှာ ကာလတာရှည်အာဟာရချို့တဲ့တဲ့ ငါးနှစ်အောက်ကလေးသူငယ် (၂၉.၂)ရာခိုင်နှုန်းရှိပြီး မူကြိုအရွယ် ကလေးငယ်တွေ လက်တလောအာဟာရချို့တဲ့မှုကြောင့် ပိန်လှီမှုနှုန်းက(၇)ရာခိုင်နှုန်း၊ အဏုအာဟာရချို့တဲ့မှုက (၅)နှစ်အောက်ကလေးတွေမှာ(၅၇.၈)ရာခိုင်နှုန်းရှိတယ်လို့ သိရပါတယ်။

 

 

Related News