ပြည်ထောင်စုငြိမ်းချမ်းရေးညီလာခံတွေမှာ ဆွေးနွေးနေတဲ့ ကဏ္ဍကြီးငါးခုထဲမှာ လက်ရှိအချိန်ထိ သဘောတူညီချက် တစ်ချက်မှ မရရှိသေးတာကတော့ လုံခြုံရေးကဏ္ဍ ဖြစ်ပါတယ်။ ဒီကဏ္ဍဟာ၂၁ရာစုပင်လုံ ဒုတိယနဲ့ တတိယ အစည်းအဝေး တွေမှ စတင်ဆွေးနွေး နိုင်ခဲ့တာဖြစ်ပြီး ဆုံးဖြတ်ချက်ချနိုင်တဲ့အဆင့်ထိတော့ မရောက်ရှိသေးတာ ဖြစ်ပါတယ်။လုံခြုံရေးကဏ္ဍဟာ လက်ရှိအမျိုးသားအဆင့်နိုင်ငံရေးဆွေးနွေးပွဲတွေမှာ ထည့်သွင်းဆွေးနွေးခွင့်မရှိပဲ ပြည်ထောင်စု အဆင့်မှာသာ ဆွေးနွေးနေတာဖြစ်ပါတယ်။ နိုင်ငံတော်ကာကွယ်ရေးနဲ့လုံခြုံရေးဆိုင်ရာ ပြန်လည်ပေါင်းစည်းခြင်းဆိုတဲ့ ခေါင်းစဉ်ကြီးနှစ်ခုရှိနေပါတယ်။ ဒီခေါင်းစဉ်တွေအောက်မှာ တစ်ခုတည်းသော တပ်မတော်ထားရှိရေးကို အရင်ဆွေးနွေး နေတာဖြစ်ပြီး လုံခြုံရေးကဏ္ဍပြုပြင် ပြောင်းလဲခြင်း(SSR)နဲ့ လက်နက်ဖြုတ်၊တပ်ဖွဲ့ဖျက် ၊ပြန်လည်ပေါင်း စည်းခြင်း (DDR) ကိစ္စရပ်တွေလည်း နောက်ပိုင်းဆက်ဆွေးနွေးရမှာဖြစ်ပါတယ်။လုံခြုံရေးကဏ္ဍကို ၂၀၁၇ မေလကပြုလုပ်တဲ့  ဒုတိယအကြိမ်၂၁ရာစုပင်လုံမှ စတင်ဆွေးနွေးနိုင်ခဲ့တာဖြစ်ပြီး တစ်ခုတည်း သော တပ်မတော်ထားရှိရေးမူဝါဒကို အဓိကဆွေးနွေးခဲ့ကြတာဖြစ်ပါတယ်။ ဒုတိယအကြိမ်ပင်လုံမှာ ဆုံးဖြတ်ချက် မချမှတ်နိုင်ခဲ့တာကြောင့် တတိယပင်လုံမတိုင်မီ ၂၀၁၈ ဧပြီနဲ့ ဇွန်လကြားမှာ အလွတ်သဘော (၄)ကြိမ် တွေ့ဆုံပြီး လုံခြုံရေးကဏ္ဍအတွက် အဖြေရှာခဲ့ကြပါသေးတယ်။

၂၀၁၈ ဇူလိုင်လအတွင်းပြုလုပ်တဲ့ တတိယအကြိမ်ပင်လုံ မှာလည်း ဆွေးနွေးမှုတွေမပြည့်စုံသေးတာကြောင့် ဆုံးဖြတ်ချက်မချနိုင်ခဲ့ပဲ ပြီးခဲ့တဲ့ အောက်တိုဘာ(၁၅)ရက်မှာပြုလုပ်တဲ့ ထိပ်သီးခေါင်းဆောင်ပိုင်းချင်း တွေ့ဆုံပွဲမှာ ထပ်မံဆွေးနွေးခဲ့ကြတာဖြစ်ပါတယ်။နိုင်ငံတော်၏အတိုင်ပင်ခံပုဂ္ဂိုလ်ကလည်း ပြည်ထောင်စုသဘောတူချက်တွေမှာ လုံခြုံရေးကဏ္ဍ သဘောတူညီချက်တွေပါမှ ပြည့်စုံမှာလို့ ၂၁ရာစုပင်လုံတတိယအစည်းအဝေးအပြီးမိန့်ခွန်းမှာပြောကြားထားပါတယ်။ လုံခြုံရေးကဏ္ဍအောက်မှာ အများပြည်သူတွေရဲ့ လုံခြုံရေးဆိုင်ရာကိစ္စရပ်တွေကို ထည့်သွင်းဆွေးနွေးသင့်ပြီး အစိုးရ၊လွှတ်တော်ရဲ့အခန်း ကဏ္ဍကို ပိုမိုမြှင့်တင်ဖို့လိုတယ်လို့ ဦးရဲမျိုးဟိန်းက သုံးသပ်ပါတယ်။

တပ်မတော်နဲ့ တိုင်းရင်းသားလက်နက်ကိုင်အဖွဲ့အစုအဖွဲ့ကြား တစ်ခုတည်းသောတပ်မတော်ထားရှိရေး မှာတော့ ဘုံသဘောထားတွေရှိထားပေမယ့် ဘယ်လိုတပ်မတော်မျိုးလည်းဆိုတဲ့ ကိစ္စမှာတော့ ဆက်လက် ညှိနှိုင်းဆွေးနွေးရဦးမှာ ဖြစ်ပေမယ့် ဆက်ဆွေးနွေးရင် အဖြေထွက်နိုင်တယ်လို့ PNLO က ခွန်ဥက္ကာက သုံးသပ်ပါတယ်။လက်ရှိအချိန်ထိ ပြည်ထောင်စုငြိမ်းချမ်းရေးညီလာခံ(၄)ကြိမ် ပြုလုပ်ပြီးဖြစ်ကာ နိုင်ငံရေးကဏ္ဍက (၁၆)ချက်၊ စီးပွားရေးကဏ္ဍက (၁၂)ချက် ၊ လူမှုရေးကဏ္ဍက (၁၁)ချက် ၊ မြေယာနဲ့သဘာဝပတ်ဝန်းကျင် ကဏ္ဍက (၁၂)ချက် စုစုပေါင်း    အချက်ပေါင်း(၅၁)ကို ပြည်ထောင်စု သဘောတူစာချုပ်ရဲ့ အစိတ်အပိုင်း အဖြစ် သဘောတူထားနိုင်ခဲ့ တာ ဖြစ်ပါတယ်။

 

 

Related News