ပြန်လည်ထူထောင်ရေးဦးစီးဌာန၊ မန္တလေးပြန်လည်ထူထောင်ရေးစခန်းမှာ စခန်းအခြေပြု မူးယစ်ဆေးဖြတ်ပြီးသူများ ပြန်လည်ထူထောင်ရေးသင်တန်းဖွင့်ပွဲကို ဇန်န၀ါရီလ (၁၄) ရက်က မန္တလေးမြို့ ပြန်လည်ထူထောင်ရေးစခန်းမှာ ပြုလုပ်ခဲ့ပါတယ်။ စခန်းအခြေပြု မူးယစ်ဆေးဖြတ်ပြီးသူများ ပြန်လည်ထူထောင်ရေးသင်တန်းကို ပြန်လည်ထူထောင် ရေးဦးစီးဌာန မန္တလေးပြန်လည်ထူထောင်ရေးစခန်းနဲ့ မြန်မာနိုင်ငံ စေတနာ့ဝန်ထမ်း မူးယစ်ကြီးကြပ်ရေးမှူးအသင်းတို့ ပူးပေါင်းဖွင့်လှစ်ခဲ့တာ ဖြစ်ပါတယ်။ ဒီသင်တန်းမှာ ဆေးကုသမှုခံယူပြီးသူတွေကို မူးယစ်ဆေးဝါးကင်းရှင်းပြီး လူ့အဖွဲ့အစည်းအတွင်း ပြန်လည်နေထိုင် ၀င်ဆံ့လာစေဖို့အတွက် လူမှုရေးအရ ပြန်လည်ထူထောင်ပေးခြင်း၊ တစ်ဦးချင်းစီရဲ့ ၀ါသနာအပေါ်မူတည်ပြီး ကိုက်ညီတဲ့ အသက်မွေးဝမ်းကြောင်း ပညာရပ်တွေ လေ့ကျင့်ပေးခြင်း စတဲ့ ရည်ရွယ်ချက်တွေနဲ့ သင်ကြားပေးသွားမှာ ဖြစ်တယ်လို့ သိရပါတယ်။

ဒါ့အပြင် လေ့ကျင့်သင်ကြားပေးတဲ့ အသက်မွေးဝမ်းကြောင်း ပညာရပ်တွေနဲ့ မိမိဘ၀ ရပ်တည်နိုင်စေဖို့ ရည်ရွယ်တယ်လို့  ပြန်လည်ထူထောင်ရေးဦးစီးဌာန ညွှန်ကြားရေးမှူး ဒေါက်တာထွန်းဇော်ကပြောပါတယ်။ဒီသင်တန်းမှာစိတ်ပိုင်းဆိုင်ရာ ပြန်လည်ထူထောင်ရေး၊ ရုပ်ပိုင်းဆိုင်ရာပြန်လည်ထူထောင်ရေး၊ အသက်မွေးဝမ်းကြောင်းဆိုင်ရာပြန်လည်ထူထောင်ရေး စတာတွေ သင်ကြားပေးသွားမှာဖြစ်ပါတယ်။ဒီသင်တန်းကိုသင်တန်းသား (၂၀) ဦး တက်ရောက်ပြီး သင်တန်းကာလ (၃၅) ရက်ကြာသင်ကြားပေးသွားမှာ ဖြစ်တယ်လို့ သိရပါတယ်။ သင်တန်းသားတွေအနေနဲ့ သင်တန်းပြီးမြောက်ပါက လူ့အဖွဲ့အစည်းအတွင်းမှာ စိတ်သစ်၊ လူသစ်နဲ့ ဘ၀သစ် စတင်နိုင်ဖို့ လိုအပ်တယ်လို့ ပြောပါတယ်။လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ပြန်လည်ထူထောင်ရေးဦးစီးဌာနအနေနဲ့ စခန်းအခြေပြုပြန်လည်ထူထောင်ရေးသင်တန်း၊ စခန်းနဲ့ ရပ်ရွာအခြေပြု ပြန်လည်ထူထောင်ရေးသင်တန်းနဲ့ ရပ်ရွာအခြေပြု ပြန်လည်ထူထောင်ရေးသင်တန်းတွေ ဖွင့်လှစ်ပေးနေတယ်လို့ သိရပါတယ်။

 

 

Related News