ရန်ကုန်မြို့တော်စည်ပင်သာယာရွေးကောက်ပွဲမဲစာရင်းတွေကို ဖေဖော်ဝါရီလမကုန်မီ ထုတ်ပြန်ကြေညာပေးဖို့ရှိတယ်လို့ ရန်ကုန်မြို့တော်စည်ပင်သာယာ ရွေးကောက်ပွဲကော်မရှင်ထံက သိရပါတယ်။ရန်ကုန်တိုင်းဒေသကြီးအစိုးရဖွဲ့က ကောက်ခံပြီးတဲ့ လူဦးရေစာရင်းကို ရန်ကုန်မြို့တော်စည်ပင်သာယာ ရွေးကောက်ပွဲကော်မရှင်ထံ ပေးအပ်ပြီးဖြစ်တယ်လို့သိရပါတယ်။ ရွေးကောက်ပွဲကော်မရှင်က လူဦးရေစာရင်းကနေ မဲစာရင်းအဖြစ်ပြုစုဖို့ ကွန်ပျူတာအသုံးပြု စာရင်းသွင်းတဲ့ လုပ်ငန်းစဉ်တွေ ဆောင်ရွက်နေပြီလည်း ဖြစ်ပါတယ်။ မြို့နယ်အချို့မှာ ကွန်ပျူတာထဲ စာရင်းသွင်း ရိုက်ထည့်တဲ့ လုပ်ငန်းစဉ်တွေ ရာနှုန်းပြည့်ပြီးစီးနေပြီဖြစ်ပေမယ့် လူဦးရေများတဲ့ လှိုင်သာယာ၊ အင်းစိန်၊ ရွှေပြည်သာနဲ့ ဒဂုံဆိပ်ကမ်းစတဲ့ မြို့နယ်တွေရဲ့ မဲစာရင်းကတော့ မပြီးပြတ်သေးဘူးလို့သိရပါတယ်။ ဒါပေမယ့်  မဲစာရင်းတွေကို ဖေဖော်ဝါရီလမကုန်မီ ထုတ်ပြန်ကြေညာဖို့ ဆောင်ရွက်နေတယ်လို့ ရန်ကုန်မြို့တော်စည်ပင်သာယာ ရွေးကောက်ပွဲကော်မရှင် ဥက္ကဋ္ဌကပြောပါတယ်။မဲစာရင်းထုတ်ပြန်ကြေညာနိုင်ပြီးရင်တော့ ရွေးကောက်ပွဲလုပ်ငန်းစဉ်တစ်ခုလုံးရဲ့ ၇၅ ရာခိုင်နှုန်းပြီးစီးတယ်လို့ ဆိုနိုင်ပြီး ပြည်သူတွေအနေနဲ့ မဲစာရင်းထုတ်ပြန်ကြေညာရင် ကိုယ့်နာမည်ပါ၊မပါကို မမေ့မလျော့သွားရောက် စစ်ဆေးပေးဖို့ ရွေးကောက်ပွဲကော်မရှင်က တိုက်တွန်းထားပါတယ်။

မဲစာရင်းထဲမှာ နာမည်မပါဝင်ခဲ့ရင်လည်း ရပ်ကွက်အုပ်ချုပ်ရေးရုံးမှာပဲ ပုံစံ(၃) ဖြည့်စွက်ကာ တစ်ပါတည်းလျှောက်ထားနိုင်မှာဖြစ်တယ်လို့သိရပါတယ်။ ဒါ့အပြင် မဲစာရင်းကြည့်ရင်း  မဲစာရင်းနံပါတ်ကိုပါ သေချာမှတ်ထားဖို့လိုတယ်လို့ ရွေးကောက်ပွဲကော်မရှင်က အသိပေးထားပါတယ်။ ရန်ကုန်မြို့တော်စည်ပင်သာယာရွေးကောက်ပွဲမှာ ရွေးကောက်ခံမယ့် ကော်မတီဝင်ကိုယ်စားလှယ်လောင်းဦးရေနဲ့ မဲဆန္ဒနယ်ခြောက်ခုကိုတော့ ဖေဖော်ဝါရီလ (၁၈) ရက်က ထုတ်ပြန်ကြေညာခဲ့ပြီးဖြစ်ပါတယ်။ ယခုနှစ် မတ်လ(၃၁)ရက်မှာပြုလုပ်မယ့် ရန်ကုန်မြို့တော်စည်ပင်သာယာရွေးကောက်ပွဲမှာ စည်ပင်နယ်နမိတ်အတွင်း တစ်နှစ်နှင့် အထက်နေထိုင်ထားတဲ့ အသက်(၁၈)နှစ်ပြည့်ပြီး မည်သူမဆို မဲပေးခွင့်ရှိတာဖြစ်ပြီး အိမ်ထောင်စုတစ်ခုကို တစ်ဦးသာမဲပေးခွင့်ရှိတဲ့ ယခင် (၂၀၁၄)စည်ပင်ရွေးကောက်ပွဲထက် မဲပေးပိုင်ခွင့်ရှိသူနဲ့မဲစာရင်းတွေ ပိုမိုများပြားလာမှာဖြစ်တယ်လို့သိရပါတယ်။

 

 

Related News