မြန်မာနိုင်ငံရင်းနှီးမြှုပ်နှံမှုဥပဒေသစ်အရ တိုင်းနဲ့ပြည်နယ်အလိုက် ဖွံ့ဖြိုးမှုအပေါ်မူတည်ပြီး ဇုန်တွေခွဲကာ ရင်းနှီးမြှုပ်နှံမှုတွေ အတွက် အခွန်ကင်းလွတ်ခွင့် (၃)နှစ်ကနေ (၇)နှစ်အထိ အခွင့်အရေးပေးထားတာဖြစ်ပါတယ်။ ဒီအခွန်ကင်းလွတ်ခွင့် ပေးထားတဲ့နေရာတွေထဲမှာ ရန်ကုန်မြို့သစ်စီမံကိန်း ဖော်ဆောင်မယ့်နေရာလည်း ပါဝင်နေပါတယ်။ ရင်းနှီးမြှုပ်နှံမှုဥပဒေအရ  တိုင်းနဲ့ပြည်နယ်အလိုက် အခွန်ကင်းလွတ်ခွင့်ဇုန်တွေကို သတ်မှတ်ထားပြီး အခု ရန်ကုန်မြို့သစ်အကောင်အထည်ဖော်မယ့် ကြည့်မြင်တိုင်တစ်ဖက်ကမ်းဧရိယာဟာ ၀င်ငွေခွန်ကင်းလွတ်ခွင့်(၅)နှစ်ပေးထားတဲ့အထဲမှာပါဝင်တယ်လို့သိရပါတယ်။ဒါပေမယ့် ဒါဟာ MIC ရဲ့ ရင်းနှီးမြှုပ်နှံမှု မြှင့်တင်ဖို့ သတ်မှတ်ထားတဲ့ လုပ်ငန်းအမျိုးအစားတွေထဲမှာပါဝင်ရမှာဖြစ်ပါတယ်။အခုစတင်အကောင်အထည်ဖော်မယ့် မြို့သစ်စီမံကိန်းပထမအဆင့်မှာတော့ ရွာ(၅)ရွာ၊ တံတား(၂) စင်း၊ ၁၀ကီလိုမီတာရှိတဲ့ စက်မှုဇုန်ဧရိယာ၊၂၆ကီလိုမီတာရှည်တဲ့ ပင်မလမ်းအပြင်  ရေသန့်နဲ့ ရေဆိုးသန့်စင် စက်ရုံစတဲ့ အခြေခံအဆောက်အဦးတွေပါဝင်မှာဖြစ်ပါတယ်။

MIC က ထုတ်ပြန်ထားတဲ့ အခွန်ကင်းလွတ်ခွင့်ရတဲ့ လုပ်ငန်းတွေထဲမှာ စက်မှုဇုန်တည်ထောင်တာနဲ့ မြို့ပြ ဧရိယာတည်ထောင်တာတွေလည်းပါဝင်နေပါတယ်။ရန်ကုန်မြို့သစ်စီမံကိန်းနဲ့ပတ်သက်ပြီး လက်ရှိမှာတော့ စီမံကိန်းမာစတာပလန်ပြီးစီးသွားပြီဖြစ်ပြီး လုပ်ကိုင်ခွင့်ရကုမ္ပဏီကို နောက်ဆုံးအဆင့်ရွေးချယ်တော့မှာ ဖြစ်ပါတယ်။ ပထမအဆင့်အနေနဲ့ ဧကနှစ်သောင်းကျော်ပေါ်မှာစတင်အကောင်အထည်ဖော်မှာဖြစ်ပြီး အစိုးရက(၈)ရာခိုင်နှုန်း ၊ ကုမ္ပဏီဘက်က (၉၂)ရာခိုင်နှုန်း အချိုးနဲ့ ရင်းနှီးမြှုပ်နှံမှာဖြစ်ကာ အမေရိကန်ဒေါ်လာသန်း(၁၆၈၀)၀န်းကျင် ကုန်ကျနိုင်တယ်လို့ ခန့်မှန်းထားတာဖြစ်ပါတယ်။ ရင်းနှီးမြှုပ်နှံမှုဥပဒေအရ အမေရိကန်ဒေါ်လာသန်း(၂၀)ထက်ပိုတဲ့ ရင်းနှီးမြှုပ်နှံမှုတွေဟာ MIC ခွင့်ပြုမိန့်လျှောက်ရမှာဖြစ်ပါတယ်။ မဖြစ်မနေ MIC ခွင့်ပြုမိန့်လျှောက်ဖို့လိုအပ်တဲ့ ကဏ္ဍ(၅)ခုရှိပြီး ဒီထဲမှာ မြို့သစ် တည်ဆောက်တာကလည်း မဟာဗျူဟာကျတဲ့ရင်းနှီးမြှုပ်နှံမှုဆိုတဲ့ ကဏ္ဍမှာပါဝင်နေပါတယ်။ရန်ကုန်မြို့သစ်စီမံကိန်းမှာတော့ ဒုတိယအဆင့်အတွက် ဧက(၁၄၈၀၀၀) ကျန်ရှိနေသေးပြီး စီမံကိန်းတစ်ခုလုံး အကောင်အထည်ဖော်ဖို့အမေရိကန်ဒေါ်လာ သန်း(၅၀၀၀)ကုန်ကျမှာဖြစ်ပါတယ်။ ဒီစီမံကိန်းကနေ အလုပ်အကိုင်(၂)သန်းဖော်ဆောင်ပေးနိုင်မယ်လို့သိရပါတယ်။

 

 

Related News