ရမည်းသင်းမြို့နယ်အတွင်းက မိုးထိမိုးမိဒေသရွှေလုပ်ကွက် လုပ်ကွက်ကြီး(A)ကို ပုဒ်မ(၁၄၄) ထုတ်ပြန်နိုင်ရေးအတွက် ဆောင်ရွက်နေတယ်လို့ မတ်လ၁၂ရက်ကနေပြည်တော်ရှိ သယံဇာတနှင့် သဘာဝပတ်ဝန်းကျင်ထိန်းသိမ်းရေး ၀န်ကြီးဌာနရုံးမှာ ပြုလုပ်တဲ့ မိုးထိမိုးမိဒေသ လုပ်ကွက် ကြီး(A)နှင့် ပတ်သက်တဲ့ သတင်းစာရှင်းလင်းပွဲမှ သိရပါတယ်။လက်ရှိအချိန်မှာ ရမည်းသင်းမြို့နယ်အတွင်းက မိုးထိမိုးမိဒေသ ရွှေလုပ်ကွက် လုပ်ကွက်ကြီး(A)မှာ ရွှေတူးဖော်ထုတ်လုပ်မှုတွေကို ယာယီ ဆိုင်းငံ့ထားတာပါ။ အဲဒီလိုဆိုင်းငံ့ထားစဉ်အတွင်း ကျူးကျော်ဝင်ရောက်ပြီး ပစ္စည်းခိုးယူတာတွေ၊ တရားမ၀င် ၀င်ရောက်ရွှေတူးဖော်တာတွေ ဖြစ်ပေါ်ခဲ့တယ်လို့ သိရပါတယ်။

ဒါကြောင့် မိုးထိမိုးမိဒေသ ရွှေလုပ်ကွက် လုပ်ကွက်ကြီး(A)မှာ တန်ဖိုးကြီးပစ္စည်းတွေခိုးယူခံရတာတွေ၊ ရွှေပါဝင်တဲ့ ဗြုန်းမြေစာတွေခိုးယူခံရတာတွေ မဖြစ်ပေါ်စေရေးအတွက် ကြီးကြပ်မှုအဆင်ပြေနိုင်စေရေးအတွက် သယံဇာတနှင့်သဘာဝ ပတ်ဝန်ကျင်ထိန်းသိမ်းရေး ၀န်ကြီးဌာနအနေနဲ့ ပုဒ်မ(၁၄၄) ထုတ်ပြန်နိုင်ရေး သက်ဆိုင်ရာ တိုင်းဒေသကြီးအစိုးရနဲ့ ညှိနှိုင်းထားပြီးပြီ ဖြစ်တယ်လို့ အမှတ်(၂)သတ္တုတွင်းလုပ်ငန်း ဦးဆောင်ညွှန်ကြားရေးမှူး ဦးသံဒိုင်က ပြောပါတယ်။

ရမည်းသင်းမြို့နယ်အတွင်းက မိုးထိမိုးမိဒေသ ရွှေလုပ်ကွက် လုပ်ကွက်ကြီး(A) ရွှေတူးဖော်ခြင်းတွေ လုပ်ကိုင်ဖို့အတွက် ၂၀၁၁ခုနှစ်မှာ တင်ဒါခေါ်ယူခဲ့ပြီး အမျိုး သားကြီးပွားတိုးတက်ရေးကုမ္ပဏီက အောင်မြင်ခဲ့ကာ ရွှေတူးဖော်မှုတွေအတွက်စာချုပ်ချုပ်ဆို ထုတ်လုပ်ခဲ့ပါတယ်။ ဒါပေမဲ့ အမျိုးသားကြီးပွားတိုးတက်ရေး ကုမ္ပဏီအနေနဲ့ စာချုပ်အရ နိုင်ငံတော်ကို ပေးသွင်းရမယ့် ရွှေစင်များကို ပေးသွင်းရန် ပျက်ကွက်ခဲ့တာ ကြောင့် ၂၀၁၇ ခုနှစ် နိုဝင်ဘာလ(၁၁)ရက်ကစတင်ပြီး အဆိုပါလုပ်ကွက်မှာ ရွှေတူးဖော်မှုတွေကို ယာယီဆိုင်းငံ့ထားခဲ့ပါတယ်။

အဲ့ဒီလိုဆိုင်းငံ့ ထားပြီးနောက်ပိုင်း ကျူးကျော်ဝင်ရောက်ပြီး ပစ္စည်းခိုးယူတာတွေ၊ တရားမ၀င် ၀င်ရောက် ရွှေတူးဖော်တာတွေ ဖြစ်ပေါ်လာခဲ့ကာ လက်ရှိအချိန် ထိ ၃၁ ကြိမ် ဖြစ်ပေါ်ခဲ့ပြီး ဖမ်းဆီးရမိသူ စုစုပေါင်း ၁၅၁ဦးအထိ ရှိခဲ့တယ်လို့ သိရပါတယ်။ အဆိုပါပမာဏမှာ စစ်ဆေးတွေ့ရှိစဉ်ဖမ်းဆီးရရှိခဲ့တာ တွေဖြစ်ပြီး လွတ်မြောက်တာတွေလဲ အများအပြားရှိခဲ့တယ်လို့ အမှတ်(၂)သတ္တုတွင်းလုပ်ငန်းမှ ဦးဆောင်ညွှန်ကြားရေးမှူး ဦးသံဒိုင်က ပြောပါတယ်။မိုးထိမိုးမိဒေသရွှေလုပ်ကွက်ဟာ ဧက ၆၁၀၅ ဧကကျယ်ဝန်းပြီး လက်ရှိအချိန်မှာ မြန်မာနိုင်ငံရဲတပ်ဖွဲ့မှ အင်အား၆၅ဦး၊ သယံဇာတနှင့်သဘာဝ ပတ်ဝန်း ကျင် ထိန်းသိမ်းရေးဝန်ကြီးဌာနမှ ၀န်ထမ်း(၂၂)ဦးအပါအ၀င် ကုမ္ပဏီမှ ၀န်ထမ်း(၂၀၀)ကျော်တို့ဖြင့်ထိန်းသိမ်းစောင့်ရှောက်နေတယ် လို့ သိရပါတယ်။

 

 

Related News