ရုံးဆင်းချိန် နဲ့ ဈေးပိတ်ချိန်တိုက်နေတဲ့ လက်ရှိရန်ကုန်ကဈေးတွေရဲ့ ရောင်းချချိန်ကို ပြန်လည်ပြင်ဆင်ပြီး ညပိုင်းအထိ ဖွင့်လှစ်နိုင်အောင်စီစဉ်နေတယ်လို့ ရန်ကုန်မြို့တော်စည်ပင်သာယာရေး ကော်မတီထံက သိရပါတယ်။ရန်ကုန်က ဈေးတွေထဲက အများစုကို ည(၈)နာရီလောက်အထိ လျှပ်စစ်မီး အပြည့်အစုံနဲ့ အဆင်ပြေပြေ ဖွင့်လှစ်နိုင်ဖို့ စီစဉ်မှာဖြစ်တယ်လို့ ရန်ကုန်မြို့တော်ဝန်က ပြောပါတယ်။ အစိုးရရုံးဆင်းချိန်ဟာ ဈေးပိတ်ချိန်ဖြစ်နေတာကြောင့် ဈေးဝယ်ယူသူတွေဘက်ကလည်း အဆင်မပြေမှုတွေရှိသလို ဆက်လက်ရောင်းချလိုတဲ့ ဈေးသည်တွေကလည်း ဈေးရဲ့အပြင်ဘက်ထွက်ရောင်းမှုတွေရှိလာတယ်လို့ မြို့တော်ဝန်ကပြောပါတယ်။ ဒီလို ညပိုင်းအထိရောင်းချနိုင်ဖို့ ပုဂ္ဂလိကကို တင်ဒါပေးပြီး ဈေးတွေကိုအဆင့်မြှင့်တင် ပြောင်းလဲရမှာဖြစ်ကာ ဒီ့အတွက်စတင်ဆောင်ရွက်နေပြီလို့သိရပါတယ်။

ရန်ကုန်တိုင်းဒေသကြီးက စီမံကိန်းတွေထည့်သွင်းဖော်ပြထားတဲ့ ရန်ကုန်စီမံကိန်းဘဏ်မှာလည်း ဈေးတွေကို အဆင့်မြှင့်တင်ဖို့ တင်ဒါခေါ်ယူထားတာရှိပါတယ်။ တာမွေဈေး၊ ပုဇွန်တောင်ဈေး ၊ ဘောက်ထော်ဈေး ၊ လှိုင်ဈေးအပါအ၀င် ဈေးပေါင်း(၂၇)ဈေးအတွက် တင်ဒါခေါ်ယူထားတာဖြစ်ပြီး ဒီလိုဆောင်ရွက်နိုင်ပါက ညပိုင်းအထိ ရောင်းချနိုင်မှာဖြစ်တယ်လို့ ရန်ကုန်တိုင်းဒေသကြီး ၀န်ကြီးချုပ်ကပြောပါတယ်။ အစိုးရဈေးတွေဟာ ပုဂ္ဂလိကဈေးတွေနဲ့ ကွာခြားနေမှုကို ပြောင်းလဲနိုင်ဖို့ဆောင်ရွက်မှာဖြစ်ပြီး အစိုးရဘတ်ဂျတ်ထက် ပုဂ္ဂလိကပါဝင်မှုနဲ့ အရင်းကျေကာလသတ်မှတ်ပြီး ဆောင်ရွက်မှာဖြစ်တယ်လို့ပြောပါတယ်။ရန်ကုန်မြို့တော်စည်ပင်သာယာရေးကော်မတီဝက်ဆိုဒ်မှာ ဖော်ပြထားတဲ့ စာရင်းတွေအရ ရန်ကုန်တိုင်းဒေသကြီးမှာ ဈေးပေါင်း (၁၇၈)ဈေးရှိပြီး အရှေ့ပိုင်းခရိုင်မှာ (၅၂)ဈေး ၊အနောက်ပိုင်းခရိုင်မှာ (၂၅)ဈေး ၊ မြောက်ပိုင်းခရိုင်မှာ (၅၇)ဈေး နဲ့ တောင်ပိုင်းခရိုင်မှာ (၄၄)ဈေးရှိပါတယ်။

 

 

 

 

Related News